នៅថ្ងៃទី ១១ ខែមីនា ឆ្នាំ ២០២៥ មជ្ឈមណ្ឌលវះកាត់កុមារ ហៅថាពេទ្យគៀនឃ្លាំង បានចេញសេចក្តីជូនដំណឹងឱ្យបានដឹងថា ខាងមន្ទីរពេទ្យនឹងមានក្រុមគ្រូពេទ្យជំនាញផ្នែកជើង មកពីប្រទេសសិង្ហបុរី ផ្តល់ជូនការពិនិត្យព្យាបាល និង វះកាត់ ចាប់ពីថ្ងៃទី ១៧ ដល់ ថ្ងៃទី ២១ ខែ មីនា ឆ្នាំ ២០២៥ ខាងមុខនេះ។
តាមប្រភពពីគេហទំព័ររបស់មន្ទីរពេទ្យផ្ទាល់បានបញ្ជាក់ឱ្យដឹងថា ចំពោះការព្យាបាលនេះ គឺសម្រាប់តែអ្នកជំងឺពេញវ័យតែប៉ុណ្ណោះ ដែលកំពុងមានបញ្ហាដូចជា៖
១. បញ្ហាឆ្អឹងត្រគាក
២. បញ្ហាឆ្អឹងប្រអប់កជើង
៣. បញ្ហាឆ្អឹងជើង
ដូចនេះសូមអ្នកជំងឺដែលមានបញ្ហាឆ្អឹងជើង ទៅចុះឈ្មោះពិនិត្យនៅថ្ងៃច័ន្ទទី ១៧ ដល់ថ្ងៃទី ២០ ខែមីនា ខាងមុខនេះ ចាប់ពីម៉ោង ៨ ព្រឹកដល់ម៉ោង ៤ ល្ងាច នៅក្នុងមជ្ឈមណ្ឌលជាតិស្តារលទ្ធភាពពលកម្មគៀនឃ្លាំងផ្លូវ ៦អា ភូមិគៀនឃ្លាំង ខណ្ឌជ្រោយចង្វារ រាជធានីភ្នំពេញ។ សម្រាប់ព័ត៌មានលម្អិតបន្ថែម សូមទាក់ទងលេខទូរស័ព្ទ 017600345 ឬ 023430202៕
