កន្លងមក យើងដឹងហើយថា ការថើបមាត់អាចចម្លងមេរោគផ្សេងៗ បង្កជាជំងឺផ្តាសាយ ជាដើម។ យ៉ាងណាមិញ ការសិក្សាថ្មីនេះ ការថើបមាត់អាចចម្លងជំងឺទាក់ទងនឹងផ្លូវអារម្មណ៍គឺ ជំងឺបាក់ទឹកចិត្ត (depression) និង ជំងឺថប់បារម្ភ (anxiety)។ នេះបើតាមការសិក្សារបស់អ៊ីរ៉ង់ ដែលត្រូវបានចុះផ្សាយដោយគេហទំព័រ New York Post ។
ចុះតើវាអាចឆ្លងបានយ៉ាងម៉េច? ពិតប្រាកដណាស់ ជំងឺបាក់ទឹកចិត្ត និង ជំងឺថប់បារម្ភ អាចជំរុញការបញ្ចេញអ័រម៉ូនស្ត្រេសហៅថា Cortisol ដែលអាចរំខានដល់តុល្យភាពបាក់តេរីនៅក្នុងមាត់។ បើតាមការស្រាវជ្រាវពីមុន គេរកឃើញថា ប្តីប្រពន្ធ ឬ ដៃគូអាចចម្លងបាក់តេរី ខណៈពេលកំពុងថើបមាត់គ្នា ហើយអាចចម្លងដល់ទៅ ៨០ លានបាក់តេរី ក្នុងរយៈពេលត្រឹមតែ ១០ វិនាទីនៃការថើបប៉ុណ្ណោះ។
ចំណែកអ្នកសិក្សាស្រាវជ្រាវថ្មីបានរកឃើញថា នៅពេលដៃគូម្ខាងកំពុងមានសុខភាពខ្សោយ និង មានបញ្ហាគេងពុំលក់ គេនឹងអាចធ្វើឱ្យដៃគូម្ខាងទៀតកើតរោគសញ្ញាស្រដៀងគ្នា នៅក្នុងរយៈពេល ៦ ខែបន្ទាប់ ក្រោយពេលបានថើបមាត់គ្នា។ ហេតុដូច្នេះបាក់តេរីគឺជាបញ្ហាចោទចម្បង។
ដើម្បីកាន់តែច្បាស់ ក្រុមអ្នកស្រាវជ្រាវបានសិក្សាទៅលើប្តីប្រពន្ធអ៊ីរ៉ង់ទើបរៀបការប្រមាណ ២៦៨ គូ។ អំឡុងពេលក្រេបទឹកឃ្មុំ គេបានចាប់ផ្តើមកត់ត្រាភាគីម្ខាង ដែលកំពុងរងបញ្ហាបាក់ទឹកចិត្ត, ថប់បារម្ភ និង មានបញ្ហាគេង ស្របពេលដែលដៃគូរបស់ពួកគេសុទ្ធតែមានសុខភាពល្អ។ អ្នកចូលរួមបានបំពេញការស្ទង់មតិ អំពីសុខភាពផ្លូវចិត្ត និង បានផ្តល់សំណាកទឹកមាត់ សម្រាប់ការវាស់ស្ទង់អ័រម៉ូនស្ត្រេស cortisol រួមទាំងបាក់តេរីមាត់ធ្មេញសម្រាប់ការវិភាគ DNA ។
ជាលទ្ធផល ភាគីដែលមានសុខភាពល្អ ជាពិសេសខាងស្រីបានកើនឡើងការថប់បារម្ភ បាក់ទឹកចិត្ត និង ពិបាកគេងនៅ ៦ ខែបន្ទាប់។ នេះសបញ្ជាក់ឱ្យឃើញថា រោគសញ្ញាទាំងប៉ុន្មានត្រូវបានឆ្លងពីដៃគូរបស់ពួកគេ។ បាក់តេរីឆ្លងមាន ៤ ប្រភេទ គឺ Clostridia, Veillonella, Bacillus និង Lachnospiraceae ដែលវាជាប់ទាក់ទងទាំងស្រុង នឹងអ្វីដែលលើកឡើងនៅខាងដើម។ ក្នុងនោះ បាក់តេរីខ្លះក៏អាចមានហានិភ័យចំពោះសុខភាពផងដែរ។
ពិតមែនទៅ អ្នកឯកទេសព្យាបាល និង អ្នកស្រាវជ្រាវ បានកត់សម្គាល់វាជាយូរមកហើយ ដែលអ្នករងសុខភាពផ្លូវចិត្ត អាចនឹងមានឥទ្ធិពលលើដៃគូរបស់ពួកគេ។ ហើយការសិក្សាថ្មីនេះ គឺជាភស្តុតាង ដែលបញ្ជាក់ថា វាអាចចម្លងបញ្ហាផ្លូវចិត្តតាមរយៈបាក់តេរីក្នុងមាត់ពិតមែន៕
