ថ្មីៗនេះ មានករណីមួយនៅប្រទេសចិន ដោយបុរសម្នាក់បានកើតអាការត្រូវថ្លង់ត្រចៀកស្តាប់មិនឮមួយជីវិត ក្រោយពីចូលចិត្តស្តាប់កាសបើកសំឡេងឮខ្លាំងជាប្រចាំ។
តាមព័ត៌មានបានឱ្យដឹងថា បុរសរូបនេះមានវ័យ ២៨ ឆ្នាំ ជាមនុស្សដែលចូលចិត្តស្តាប់កាសជាប្រចាំ ព្រមទាំងបើកសំឡេងឮខ្លាំង។ យូរៗក៏ចាប់ផ្តើមស្តាប់មិនសូវឮ តែក៏មិនចាប់អារម្មណ៍ខ្លួនឯង លុះនៅថ្ងៃមួយ សុខៗបុរសរូបនេះស្តាប់មិនឮសំឡេងនាឡិការោទិ៍ ទើបបានប្រញាប់ទៅមន្ទីរពេទ្យ ហើយខាងគ្រូពេទ្យបានឱ្យដឹងថា ត្រចៀករបស់គេបានបាត់បង់ការស្តាប់រហូតហើយ នេះព្រោះតែមកទទួលការព្យាបាលយឺតពេក។
គ្រូពេទ្យបានឱ្យដឹងបន្តថា ដើម្បីរក្សាការស្តាប់របស់ត្រចៀកគួរតែបើកត្រឹម ៦០ ភាគរយនៃសំឡេងទាំងអស់ ហើយមិនគួរស្តាប់កាសម្តងលើសពី ៦០ នាទីឡើយ ព្រមទាំងត្រូវរើសកាសដែលមានគុណភាពល្អ និង ត្រូវសម្គាល់ការស្តាប់របស់ខ្លួនឱ្យបានដិតដល់ ចៀសវាងការមានបញ្ហា និង ព្យាបាលមិនទាន់ពេល៕
ប្រភព៖ Khaosod
