នៅថ្ងៃទី ៧ ខែកក្កដា ឆ្នាំ ២០២៥ ខាងមុនេះ គឺជាខួបលើកទី ១៧ ឆ្នាំ ហើយ ដែលសម្បត្តិវប្បធម៌ដ៏មានតម្លៃរបស់កម្ពុជាគឺ ប្រាសាទព្រះវិហារ ត្រូវបានអង្គការយូណេស្កូសម្រេចដាក់ជាសម្បត្តិបេតិកភណ្ឌពិភពលោក (៧ កក្កដា ២០០៨- ៧ កក្កដា ២០២៥)។
ដោយឡែក ងាកទៅកាន់កម្មវិធី Preah Vihear Temple Run ដែលមានការរៀបចំឡើងដោយ លោក សាយ ស្ថាបនិកកម្មវិធី Run With Sai ក៏បានត្រៀមរៀបចំការរត់ឡើងទៅកាន់ប្រាសាទព្រះវិហារជាថ្មីម្តងទៀតដែរ ដោយឆ្នាំនេះ គឺជាលើកទី ៣ ហើយ។
កម្មវិធី Preah Vihear Temple Run ២០២៥ ដើម្បីអបអរខួបលើកទី ១៧ នៃការដាក់បញ្ជូលប្រាសាទព្រះវិហារចូលបញ្ជីបេតិកភណ្ឌពិភពលោក នឹងរៀបចំឡើងនៅថ្ងៃទី ០៦ ខែកក្កដា ឆ្នាំ ២០២៥ ខាងមុខនេះ នៅតំបន់ប្រាសាទព្រះវិហារ។ វិញ្ញាសានៃការរត់ គឺមានចំនួន ៤ ដូចជា រយៈចម្ងាយ ១,៣៣ គីឡូម៉ែត្រ, ៩ គីឡូម៉ែត្រ, ២២,៦ គីឡូម៉ែត្រ និង ៤២,៥ គីឡូម៉ែត្រ។
ក្នុងការរត់នៅក្នុងឆ្នាំនេះដែរ កម្មវិធី Preah Vihear Temple Run ក៏នឹងមានការចូលរួមរត់ឆ្លងកាត់ឧបសគ្គទៅកាន់សំណង់ស្ថាបត្យកម្មសម្បត្តិបេតិកភណ្ឌពិភពលោកដ៏មហិមា នៃរមណីយដ្ឋានប្រាសាទព្រះវិហារ ពីសំណាក់បុគ្គលល្បីៗជាច្រើន រួមមានអ្នកផលិតមាតិកា អ្នករត់អាជីព និង សិល្បករ សិល្បការិនីមួយចំនួនទៀត ដើម្បីអបអរ និង ជាសក្ខីភាពអបអរសាទរខួបទី ១៧ ឆ្នាំនេះ៕
