បន្ទាប់ពីបានទស្សនាភាពយន្តខ្នាតធំដ៏ល្បី «ភ្លើងឆេះក្លឹបក្រោមដី» របស់ផលិតកម្ម LD ឃើញថាមហាជនលើបណ្ដាញសង្គមកំពុងផ្ទុះចែករំលែក និង បញ្ចេញមតិសរសើរខ្លាំងចំពោះរឿងនេះ ថាល្អមើលខ្លាំងទាំងសាច់រឿង ទាំងប្លង់ថត និង តួសម្ដែងនីមួយៗមានទេពកោសល្យសម្ដែងប៉ិនប្រសប់សមខ្លាំង។
បើនិយាយពីតួអង្គក្នុងសាច់រឿងនេះ មហាជនដែលបានទស្សនាច្បាស់ជាបានស្គាល់ហើយពីតួអង្គឈ្មោះពិសី ជាតួអង្គត្រូវបានព្រាយចូលសណ្ឋិតនោះ កំពុងផ្ទុះការចាប់អារម្មណ៍ខ្លាំងពីទេពកោសល្យនៃការសម្ដែងជាតួព្រាយរបស់នាង ទាំងទឹកមុខ កាយវិការសមគួរឱ្យខ្លាចព្រឺសម្បុរ។
ជាពិសេស តាមរយៈការចែករំលែក និង មតិរបស់មហាជនដែលបានទស្សនារួច ចំពោះឈុតឆាកមួយក្នុងសាច់រឿង «ភ្លើងឆេះក្លឹបក្រោមដី» នេះ ខណៈតួអង្គ ពិសី កាន់ពូថៅកាប់ទ្វារ ដើម្បីទៅរកប្អូនប្រុសរបស់តួអង្គប្រុស សំណាង ជាឈុតមួយធ្វើឱ្យមហាជនភ័យរន្ធត់រឹងខ្លួនខ្លាំងសឹងភ្លេចដកដង្ហើម ព្រោះតែតួអង្គ ពិសី ត្រូវព្រាយចូលនេះ សម្ដែងលេងទឹកមុខកាន់តែកាចសាហាវគួរឱ្យខ្លាចខ្លាំងបំផុត៕
