នៅវេលាម៉ោង ៤៖០០ នាទីរសៀល ថ្ងៃទី ២៥ ខែកក្កដា ឆ្នាំ ២០២៥ នេះ កម្ពុជា បានបើកសន្និសីទសារព័ត៌មាន ស្ដីពីបច្ចុប្បន្នភាពនៃការឈ្លានពានរបស់កងទ័ពថៃ មកលើទឹកដីកម្ពុជា។
នៅក្នុងសន្និសិទសារព័ត៌មាន នៅថ្ងៃទី ២៥ ខែកក្កដា ឆ្នាំ ២០២៥ នេះ លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និង ជាអ្នកនាំពាក្យក្រសួងការពារជាតិ បានបញ្ជាក់ពីការវិវត្តន៍នៃការឈ្លាពានរបស់ភាគី ដែលលោកស្រីបានបញ្ជាក់ឱ្យបានដឹងថា នៅក្នុងទម្រង់នៃការវាយលុកមកកាន់ទឹកដីកម្ពុជា ភាគីថៃបានប្រើប្រាស់កាំភ្លើងធំផ្លោង ការប្រើប្រាស់យន្តហោះទម្លាក់គ្រាប់បែកF-16 ការប្រើរថក្រោះបាញ់សង្គ្រប់ ការប្រើដ្រូនទម្លាក់គ្រាប់ ជាងនេះទៅទៀត គឺការប្រើប្រាស់គ្រាប់បែកចង្កោម។
អ្នកនាំពាក្យបានបន្តឱ្យដឹងថា នៅក្នុងសកម្មភាពនៃការប្រើប្រាសអាវុធធន់ធ្ងន់ៗ វាយលុកមកលើប្រទេសកម្ពុជា ថៃបានប្រើប្រាស់យន្តហោះF-16 ទម្លាក់គ្រាប់បែកចំនួន ៤ លើក ដោយលើកទី ១ នៅប្រាសាទព្រះវិហារ វត្តកែវសិក្ខាគិរីស្វារៈ ចំនួន ៣ លើក នៅចន្លោះម៉ោង ១២៖ ៣០ នាទី ដល់ម៉ោង ១២ ៖ ៤០ នាទី និងតំបន់តាក្របី ចំនួន ១ លើក។
ក្នុងនោះផងដែរ ទង្វើយ៉ាងយង់ឃ្នងរបស់ភាគីថៃ គិតចាប់ពីការវាយប្រហារកាលពីព្រឹកថ្ងៃទី ២៤ ខែកក្កដា មកទល់ពេលនេះ ឃើញថាគោលដៅដែលភាកីថៃបានធ្វើការវាយប្រហារ គឺចំគោលដៅភូមិរបស់ប្រជាពលរដ្ឋរស់នៅ ក្នុងនោះមាននៅក្នុងក្រុងសំរោង ខេត្តឧត្តរមានជ័យ ដែលឈានដល់ផលប៉ះពាល់យ៉ាងធ្ងន់ធ្ងរដល់ទ្រព្យសម្បត្តិរបស់ប្រជាពលរដ្ឋ ពិសេសមានអ្នករងរបួស ក្នុងនោះមានមនុស្សចាស់ និង កូនក្មេង ខណៈអ្វីដែលគួរឱ្យសោកសង្រេងជាងគេនោះ គឺប៉ះពាល់ដល់កុមារផងដែរ៕
