អ្នកធ្វើការ Office បើមិនឧស្សាហ៍ធ្វើរឿង ៥ យ៉ាងនេះទេ ប្រាក់ខែអាចនៅនឹងថ្កល់ ស្រួលមិនស្រួលមេដកចោលដូចស្ពៃ

ការឡើងប្រាក់ខែអាស្រ័យទៅលើកត្តាច្រើនយ៉ាង។ ជាទូទៅគេនឹងវាតម្លៃទៅលើសមិទ្ធផល ការខិតខំប្រឹងប្រែង និង ភាពសកម្មជាក់ស្តែង។ មួយដែលសំខាន់ទៀតនោះ សម័យនេះ បើមិនចេះអភិវឌ្ឍន៍ខ្លួន ឬមិនមានអ្វីដែលថ្មី កុំសង្ឃឹមបានឡើងប្រាក់ខែ ថាមិនស្រួលមេដេញចេញទៀត។ ដូចនេះដើម្បីអភិវឌ្ឍន៍ខ្លួន បានទាំងកើនសមត្ថភាព អាចឡើងទាំងប្រាក់ខែ មានចំណុច ៥ យ៉ាង ដែលអ្នកគួរសកម្មចាប់ពីឥឡូវនេះ។

១. បង្កើនសមត្ថភាពធ្វើការទ្វេដង

អ្វីៗត្រូវតែអភិវឌ្ឍន៍ទៅមុខជានិច្ច។ ដើម្បីអភិវឌ្ឍន៍សមត្ថភាពបាន អ្នកត្រូវចេះបត់បែនទៅតាមភាពជឿនលឿន ដូចជាការប្រើប្រាស់បច្ចេកវិទ្យាមកពន្លឿនការងារឱ្យកាន់តែរហ័សជាងមុន និងមានប្រសិទ្ធភាពជាងមុន។ ឧទាហរណ៍ដូចជាការប្រើបច្ចេកវិទ្យា AI ឬបញ្ញាសិប្បនិម្មិតមកសម្រួលនៅក្នុងការងារ។

២. ស្វែងរកអតិថិជនបន្ថែម

អតិថិជនចាស់ក៏នៅ អតិថិជនថ្មីក៏ត្រូវរកបន្ថែម។ ត្រូវរិះរកវិធីភ្ជាប់ទំនាក់ទំនងជាមួយអតិថិជនថ្មីៗ ដោយមិនត្រឹមតែតាមរយៈប្រព័ន្ធអនឡាញ តែថែមទាំងនៅខាងក្រៅផងដែរ។ ដូចជាការចូលរួមកម្មវិធីតាំងពិព័រណ៍ ឬកម្មវិធីជួបជុំអ្នកជំនួញឬអាជីវករជាដើម។ អ្នកក៏អាចស្វែងរកព្រឹត្តិការណ៍ដែលនឹងកើតឡើងប្រចាំសប្តាហ៍ឬប្រចាំខែ ដែលគេបង្កើតឡើងនៅលើបណ្តាញសង្គម។ ក្រុមហ៊ុនខ្លះសុខចិត្តចំណាយលុយឱ្យបុគ្គលិកទិញសំបុត្រចូលរួម ដោយសារកម្មវិធីមួយចំនួនប្រជុំទៅដោយអតិថិជនគោលដៅធំៗ។

៣. បង្កើតវិធីដែលអាចទាញចំណូល

មនុស្សសម័យនេះចូលចិត្តអ្វីដែលថ្មីហើយប្លែកជានិច្ច។ ការបង្កើតគំនិតច្នៃប្រតិដ្ឋសម្រាប់ការធ្វើទីផ្សារ រមែងតែជាចំណីអារម្មណ៍របស់អតិថិជន។ ដូច្នេះត្រូវស្វែងយល់អំពីទំនោរនិយមរបស់មនុស្សសម័យទំនើប ហើយបង្កើតគំនិតច្នៃប្រតិដ្ឋឱ្យបានច្រើន មិនថាទៅលើសេវាកម្មឬផលិតផល ត្រូវមានការផ្លាស់ប្តូរថ្មី អាចជាទំនើបកម្ម រូបរាង រូបមន្ត ឬមានអ្វីដែលពិសេសជាងសព្វដង។

៤.អាចធ្វើការបានច្រើនជំនាញ

មនុស្សចេះច្រើនជំនាញតែងមានឱកាសច្រើន។ ត្រូវរៀនសូត្រជំនាញថ្មីៗ អាចជាជំនាញពាក់ព័ន្ធនឹងការងារដែលកំពុងធ្វើ ឬជំនាញដែលគេកំពុងត្រូវការ។ ការចេះច្រើនជំនាញអាចបង្ហាញពីភាពឆ្លាតវៃ និង មានសមត្ថភាពខ្ពស់។ ក្រុមហ៊ុនកម្រចោលណាស់អ្នកដែលចេះធ្វើច្រើនមុខក្នុងពេលតែមួយ។

៥.ស្មោះត្រង់ គោរពតួនាទី និង មានសុជីវធម៌ល្អ

ជាផ្នែកមួយសំខាន់នៅក្នុងសង្គមការងារសព្វថ្ងៃ មិនថាពូកែប៉ុនណា បើគ្មានភាពស្មោះត្រង់ មិនគោរពតួនាទី និង គ្មានសុជីវធម៌ ក្រុមហ៊ុននឹងមិនទុកទៀតនោះឡើយ។ បើទុកនាំតែបង្កភាពមិនល្អចំពោះក្រុមហ៊ុនដូចជា ជាគំរូអាក្រក់ដល់បុគ្គលិកដទៃ បង្កភាពចម្រូងចម្រាសនៅក្នុងក្រុមហ៊ុន នាំឱ្យកេរ្តិ៍ឈ្មោះក្រុមហ៊ុនធ្លាក់ចុះ និង ឆ្ពោះទៅរកភាពវិនាស៕