Scarr’s Pizza គឺជាហាងភីហ្សាដ៏មានប្រជាប្រិយភាពមួយនៅទីក្រុងញ៉ូវយក សហរដ្ឋអាមេរិក។ នៅពីក្រោយនំក្តៅៗដ៏ឈ្ងុយឆ្ងាញ់ បុរសរាងសង្ហាម្នាក់ ខ្លួនលម្អដោយស្នាមសាក់ បានកំពុងចម្អិននំយ៉ាងស្ទាត់ជំនាញ ដែលឥលូវនេះ លោកបានហក់កាន់តែខ្ពស់ ដោយបានបង្ហាញខ្លួននៅលើវិថីដើរម៉ូដអន្តរជាតិ ផ្ទុះការចាប់អារម្មណ៍ខ្លាំងនៅអឺរ៉ុប។
បុរសធ្វើការជាអ្នកដុតនំភីហ្សានេះ មានឈ្មោះថា Christiano Wennmann អាយុ ២៤ ឆ្នាំ។ លោកទើបតែភ្ជាប់ខ្លួនទៅនឹងអាជីពម៉ូឌែលនៅឆ្នាំ ២០២៥ នេះ ដោយបានដើរបង្ហាញម៉ូដឱ្យម៉ាកហ្វេហ្សិនសម្លៀកបំពាក់ដ៏ល្បី Willy Chavarria នៅក្នុងព្រឹត្តិការណ៍បង្ហាញម៉ូដលំដាប់អន្តរជាតិ Paris fashion week។ ហើយឆាប់ៗនេះ លោកនឹងចូលរួមជាមួយយុទ្ធនាការថតផ្សព្វផ្សាយ ឱ្យប្រ៊េនល្បីដទៃទៀតដូចជា Tinder ជាដើម។
ការក្លាយជាម៉ូឌែអាជីព វាហាក់ដូចជារឿងចៃដន់ ដែលដំបូងឡើយ មានបុរសម្នាក់ជាម្ចាស់ប្រ៊េនហ្វេហ្សិន Willy Chavarria បានមកទិញភីហ្សានៅហាង Scarr’s Pizza ដែលបុរសដុតនំខាងលើកំពុងធ្វើការ។ ម្ចាស់ប្រ៊េននេះ ត្រូវបានពេញចិត្តពីតារាចម្រៀងល្បីៗដូចជា Justin Bieber, Kendrick Lamar និង Billie Eilish។
ពេលកំពុងទិញភីហ្សា បុគ្គលម្ចាស់ប្រ៊េនបានចាប់អារម្មណ៍បុរសធ្វើនំ ដែលកំពុងនៅពីក្រោយបញ្ជរ ខ្លួនពោរពេញទៅដោយម្សៅនំ លាយឡំរំលេចស្នាមសាក់ដ៏សិចស៊ី នោះគឺ Christiano Wennmann។ ភ្លាមនោះគេក៏បានទាក់ទងលោក ឱ្យធ្វើជាម៉ូឌែលខោក្នុងរបស់ប្រ៊េនតែម្តង។
ពេលទាក់ទងភ្លាម Christiano Wennmann តម្រូវប្រញាប់ហោះហើរទៅកាន់ទីក្រុងប៉ារីស ប្រទេសបារាំង ជាកន្លែងមូលដ្ឋានរបស់ម៉ាកយីហោ។ លោកបានសុំការអនុញ្ញាតពីម្ចាស់ហាង ហើយមេរបស់លោកក៏ដូចចិត្តទៀត ដោយមិនត្រឹមតែបើកផ្លូវឱ្យប៉ុណ្ណោះទេ តែថែមទាំងលើកទឹកចិត្តឱ្យចាប់អាជីពនេះទៀតផង។
មេរបស់លោកបាននិយាយថា៖ «ច្បាស់ជាបាន អ្នកត្រូវតែធ្វើវា វាជាឱកាសផ្លាស់ប្តូរជោគវាសនាជីវិត»។ មេរបស់លោកធានានឹងរកមនុស្សមកគ្រប់គ្រងការងារដុតនំនេះ ហើយធ្វើឱ្យអ្វីៗគ្រប់យ៉ាងដំណើរការធម្មតា កុំបារម្ភ។
មិនយូរប៉ុន្មាន បុរសដុតនំបានក្លាយជាម៉ូឌែលមួយរំពេច។ Christiano Wennmann បានដើរនៅលើឆាកបង្ហាញម៉ូដនៃម៉ាកសម្លៀកបំពាក់ Willy Chavarria សម្រាប់ខូឡិកហ្សិនរដូវត្រជាក់ ២០២៥ នៅក្នុងព្រឹត្តិការណ៍ Paris fashion week ដែលក្នុងនោះមានការចម្រៀងអម ដោយតារាចម្រៀងឡាទីនដ៏ល្បី លោក J Balvin។
ព្រឹត្តិការណ៍ដើរបង្ហាញម៉ូដត្រូវបានចុះផ្សាយតាមសារព័ត៌មានហ្វេហ្សិនល្បីជួរមុខដូចជា Vogue និង Harper’s Bazaar ជាដើម។ ក្រោយបង្ហាញខ្លួនលើឆាក Christiano Wennmann ត្រូវបានគេកក់សម្រាប់ការថតម៉ូដ ថតយុទ្ធនាការផ្សាព្វផ្សាយ និង ចុះក្នុងទស្សនាវដ្តីដូចជា Dazed និង HERO ក៏ដូចជាបង្ហាញម៉ូដឱ្យអ្នកច្នៃម៉ូដ Sami Miro ផងដែរ។
ចុះសួរថាតើឥលូវ Christiano Wennmann ឈប់ធ្វើការជាអ្នកដុតនំឬ? ចម្លើយគឺអត់ទេ។ លោកនៅតែធ្វើការជាអ្នកដុតនំភីហ្សានៅហាង Scarr’s Pizza ដដែល។ មានន័យថាលោកធ្វើទាំងពីរ។
លោកបាននិយាយថា៖ «ខ្ញុំនៅតែធ្វើភីហ្សាធម្មតា ការធ្វើម៉ូឌែលមិនអាចផ្លាស់ប្តូរខ្ញុំជានរណា មកពីណាឡើយ។ ខ្ញុំនៅតែដូចពីមុន។ វាពិតជាមានសារសំខាន់សម្រាប់ខ្ញុំ ដែលខ្ញុំនៅតែរក្សាភាពពិតជាខ្ញុំ។ ខ្ញុំមិនចង់បំភ្លេចកន្លែង ដែលខ្ញុំមកនោះទេ»៕
ប្រភព៖ New York Post
