អ្នកដឹកអីវ៉ាន់ភ័យស្លេកមុខ បានសេវាតែជាង ៣ ដុល្លារ ប្រថុយដឹកក្រពើរស់ ដឹកសុខៗក្រពើរើរហែកបាវតាមផ្លូវ ភ័យបះសក់

មានករណីដ៏គួរឱ្យហួសចិត្តអស់សំណើចមួយនៅប្រទេសចិន ដែលមានអ្នកដឹកអីវ៉ាន់ម្នាក់ត្រូវគេហៅឱ្យដឹកសត្វក្រពើ តែមិននឹកស្មានថាជាក្រពើនៅរស់ មានអីរើរហែកបាវកណ្តាលផ្លូវ ធ្វើឱ្យអ្នកដឹកភ័យស្លេកមុខ។

តាមព័ត៌មានបានឱ្យដឹងថា បុរសខាងលើនេះជាអ្នកដឹកអីវ៉ាន់នៅក្នុងទីក្រុង Guangzhou ហើយនៅថ្ងៃកើតហេតុគេត្រូវដឹកសត្វក្រពើមួយក្បាលពីតំបន់ Liwan ទៅកាន់ហាងអាហារមួយកន្លែងនាទីក្រុង Fanyu ក្នុងថ្លៃសេវាប្រហែលជាង ៣ ដុល្លារ ជាពិសេស គឺមិនបានដឹងមុនថាសត្វក្រពើនេះនៅរស់ឡើយ។ លុះដឹកសុខៗ ស្រាប់តែសត្វក្រពើនោះក៏ចាប់ផ្តើមរើខ្លាំងទៅៗ រហូតដល់ធ្លាក់តាមផ្លូវ និងរហែកបាវទៀត ដែលធ្វើឱ្យអ្នកដឹកចាប់ផ្តើមភ័យហើយក៏បានយកជើងជាន់ តែត្រូវក្រពើខាំដាច់ស្បែកជើងមួយចំហៀង។

យ៉ាងណាមិញ បុរសជាអ្នកដឹកមានការភិតភ័យពេក ក៏បានខលទៅប៉ូលិសឱ្យមកជួយអន្តរាគមន៍។ ដោយឡែកបុរសអ្នកដឹកបានឱ្យដឹងថា បើដឹងថាក្រពើនេះនៅរស់តាំងពីដំបូង ខ្លួនមិនប្រថុយដឹកនោះទេ ហើយចុងក្រោយបុរសនេះក៏ត្រូវបានគេឱ្យសំណងចំនួនជិត ៣០ ដុល្លារ សម្រាប់ស្បែកជើងដែលត្រូវក្រពើខាំដាច់៕

ប្រភព៖ Khaosod