នៅរសៀលថ្ងៃទី ២៩ ខែឧសភា ឆ្នាំ ២០២៥ នេះ ក្រុមការងារព័ត៌មាន និង ប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបំភ្លឺករណីហិង្សាមួយ កើតឡើងដោយសារគ្រោះថ្នាក់ចរាចរណ៍បន្តិចបន្តួចហើយប៉ះពាក្យសម្តីគ្នា ធ្វើឱ្យបុរសម្ចាស់រថយន្ត បានវាយអ្នកដឹកជញ្ជូនទំនិញតាមអនឡាញម្នាក់ ឈ្មោះ វ៉ាន់ ដាមសុធាវ័ន កាលពីវេលាម៉ោង ១០:១០ នាទីយប់ ថ្ងៃទីប២៧ ខែឧសភា ឆ្នាំ ២០២៥ ស្ថិតនៅតាមបណ្តោយផ្លូវជាតិលេខ១ សង្កាត់វាលស្រូវ ខណ្ឌច្បារអំពៅ រាជធានីភ្នំពេញ។
ទាក់ទិនទៅនឹងរឿងនេះ នៅថ្ងៃទី ២៨ ខែឧសភា ឆ្នាំ ២០២៥ សមត្ថកិច្ចបានអញ្ជើញភាគីទាំងពីរមកកាន់ប៉ុស្តិ៍នគរបាលរដ្ឋបាលរាលស្បូវ ដើម្បីសួរនាំ ក្រោយពីសួរនាំរួច ភាគីទាំងពីរបានសំណូមពរសមត្ថកិច្ចសុំសម្របសម្រួលបញ្ចប់រឿង មិនមានការប្តឹងផ្តល់គ្នានោះទេ ដោយភាគីបុរសដែលប្រើអំពើហិង្សា យល់ព្រមសងសំណងជំងឺចិត្តចំនួន ២ លានរៀល ជូនដល់ភាគីអ្នកដឹកជញ្ជូនទំនិញតាមអនឡាញ ហើយសមត្ថកិច្ចធ្វើការណែនាំអប់រំ និង ធ្វើកិច្ចសន្យាមិនឱ្យមានករណីហិង្សានោះទៀត។
ដោយឡែក បន្ទាប់ពីដោះស្រាយករណីហិង្សារួចរាល់ នៅថ្ងៃដដែល សមត្ថកិច្ចបានទទួលដីកាបង្គាប់ឱ្យចាប់ខ្លួនពីចៅក្រមស៊ើបសួរសាលាដំបូងខេត្តរតនគីរី បញ្ជាឱ្យឃាត់ខ្លួនជនត្រូវចោទឈ្មោះ វ៉ាន់ ដាម សុធាវ័ន (ហៅ កណ្តុរ) និង ជាអ្នកដឹកជញ្ជូនខាងលើ ពីបទលួចមានស្ថានទម្ងន់ទោសដោយសារការប្រព្រឹត្តអំពើហិង្សា (ធាក់ប្លន់យកម៉ូតូ) ប្រព្រឹត្តនៅចំណុចភូមិល្អឺន ឃុំតឺន ស្រុកកួនមុំ ខេត្តរតនគីរី កាលពីថ្ងៃទី ២៤ ខែធ្នូ ឆ្នាំ២០២៣ កន្លងទៅ ដែលបច្ចុប្បន្នជនរូបគេបានរត់គេចពីខេត្តរតនគីរី មកលាក់ខ្លួននៅរាជធានីភ្នំពេញ ប្រកបមុខរបរជាអ្នកដឹកជញ្ជូន ស្នាក់នៅភូមិគោកឃ្លៀង សង្កាត់គោគឃ្លៀង ខណ្ឌសែនសុខ។
បច្ចប្បន្ននេះ ជនត្រូវចោទខាងលើ ត្រូវកម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានប្រគល់ខ្លួនទៅកម្លាំងស្នងការដ្ឋាននគរបាលខេត្តរតនគីរី យកទៅចាត់ការតាមនីតិវិធី៕
