ថ្មីៗនេះ នៅតាមបណ្តាញសង្គមរបស់ប្រទេសចិន មានការចែកចាយពីករណីរបស់នារីម្នាក់ ដែលចូលចិត្តដាក់កុំព្យូទ័រលើភ្លៅជាញឹកញាប់ រហូតបណ្តាលឱ្យកើតការរលាកស្បែកឡើងជាំស្វាយយ៉ាងមិននឹកស្មាន។
រឿងរ៉ាវខាងលើនេះ ត្រូវបានចែកចាយដោយវេជ្ជបណ្ឌិតមួយរូប ដែលជាអនុប្រធាននាយកដ្ឋានសើស្បែក និងវះកាត់កែសម្ផស្ស នាមន្ទីរពេទ្យមួយកន្លែង ក្នុងខេត្ត Zhejiang ។ តាមព័ត៌មានបានឱ្យដឹងថា នារីរូបនេះមានវ័យ ២០ ឆ្នាំ បានប្រញាប់ទៅពេទ្យពិនិត្យមើល ក្រោយពីឃើញថាភ្លៅរបស់នាងមានឡើងសរសៃស្នាមជាំខុសពីធម្មតា។
ក្រោយពីធ្វើការវិនិច្ឆ័យ វេជ្ជបណ្ឌិតបានរកឃើញថានេះគឺជាអាការៈ Erythema Ab Igne – EAI ដែលជាស្ថានភាពនៃស្បែកដែលឡើងជាំ ឬកន្ទួល បណ្តាលមកពីកម្តៅ ដោយនារីរូបនេះបានយកកុំព្យូទ័រមកដាក់ប្រើប្រាស់នៅលើភ្លៅអស់ជាច្រើនសប្តាហ៍ ហើយកម្តៅដែលចេញពីកុំព្យូទ័រក៏បានធ្វើឱ្យនាងកើតអាការនេះ។ យ៉ាងណាមិញ វេជ្ជបណ្ឌិត បានណែនាំឱ្យនារីរូបនេះឈប់ដាក់កុំព្យូទ័រប្រើប្រាស់នៅលើភ្លៅ ហើយក៏បានឱ្យថ្នាំ ព្រមទាំងវីតាមីនផ្សេងៗឱ្យនាងលាប ដើម្បីជួយស្បែកឱ្យត្រឡប់មកសភាពដើមវិញ៕
ប្រភព៖ Sanook
