កាលពីថ្ងៃទី ៣០ ខែកក្កដា ឆ្នាំ ២០២៥ កន្លងទៅនេះ បន្ទាប់ពីទទួលដំណឹងជុំវិញរឿងបុគ្គល Nawat ដែលគេស្គាល់ថាម្ចាស់កម្មវិធីប្រកួតបវរកញ្ញាមួយរូបរបស់ថៃ បានប្រើវេទិកា Miss Universe Thailand ជាសាធារណៈ វាយប្រហារមកលើប្រមុខថ្នាក់ដឹកនាំរបស់កម្ពុជាយ៉ាងធ្ងន់ធ្ងរនោះ ក៏បានឃើញស្ថាប័ន MUC ចេញសេចក្ដីប្រកាសថ្កោលទោសយ៉ាងដាច់អហង្ការ ចំពោះបុគ្គលរូបនេះចំពោះទង្វើប្រាស់ចាកពីភាពថ្លៃថ្លូរ និង អសីលធម៌មកលើកម្ពុជា។
ក្នុងសេចក្ដីប្រកាសនេះដែរ ខាងស្ថាប័ន Miss Universe Cambodia ក៏បានប្រកាសជូនមហាជនកម្ពុជាឱ្យបានដឹងថា កម្មវិធី Miss Universe ជាកម្មវិធីអន្តរជាតិមួយ និង ជានិមិត្តសញ្ញាសកលមួយ ដែលមានវ័យចំណាស់នៅលើពិភពលោក ដោយបច្ចុប្បន្ន Miss Universe ជាកម្មសិទ្ធិរួមរបស់ក្រុមហ៊ុន ២ គឺ ក្រុមហ៊ុន JKN Global Group (ថៃ) និង ក្រុមហ៊ុន Legacy Holding (មិចស៊ិក) ដែលការគ្រប់គ្រងនានាគឺធ្វើឡើងចេញពីការិយាល័យ Miss Universe Americana LLC មានទីតាំងនៅទីក្រុងញូយ៉ក សហរដ្ឋអាមេរិក។ រីឯចំពោះបុគ្គលឈ្មោះ Nawat ក្រៅពីតួនាទីជាអ្នកគ្រប់គ្រងកម្មវិធី Miss Universe Thailand គឺមិនមានតំណែង ឬ ភាគហ៊ុនណាមួយនៅក្នុងកម្មវិធីអន្តរជាតិ Miss Universe នោះទេ។
លើសពីនេះ ក្រៅពីសេចក្ដីប្រកាសជូនដំណឹងនេះដែរ ម្ចាស់ស្ថាប័ន Miss Universe Cambodia លោក Chhoy D. Archi បានបញ្ជាក់ដោយអះអាងជាដាច់ខាតថា បើបុគ្គល Nawat មានភាគហ៊ុនតែ ១% ក្នុងកម្មវិធីអន្តរជាតិ Miss Universe គឺលោកនឹងឈប់កាន់សិទ្ធិកម្មវិធី MUC នេះភ្លាម៕
