មហាជននិយមតាមដានវិស័យបវរកញ្ញា ច្បាស់ជាបានជ្រាបមកហើយ ពីភាពលេចធ្លោ និង ជោគជ័យយ៉ាងខ្លាំងលើវិស័យភាពយន្តរបស់បវរកញ្ញា គុណ កន្និកា ម្ចាស់មកុដ Miss Teen Icon Cambodia 2024។
ក្នុងនោះដែរ បវរកញ្ញារូបនេះ បានទទួលការគាំទ្រយ៉ាងខ្លាំងក្នុងអាជីពជាតារាសម្តែងបន្ទាប់ពីនាងបានបង្ហាញវត្តមានក្នុងរឿង «ភ្លើងឆេះក្លឹបក្រោមដី» និង ភាពយន្តជាច្រើនទៀតរួមមាន រឿង «លង់ស្នេហ៍ពូក្មេង» និង រឿង«ព្រាយបំពេកូន» ដែលត្រៀមចាក់បញ្ចាំងគ្រប់រោងភាពយន្តខ្មែរឆាប់ៗខាងមុខជាដើម។
ងាកមកកាន់វិស័យបវរកញ្ញាវិញ ពេលនេះយុវតីរូបនេះ កំពុងត្រៀមតំណាងកម្ពុជាចូលរួមប្រកួតលើឆាកអន្តរជាតិ Miss Teen Icon International ក្នុងឆ្នាំ ២០២៥ នេះ ដែលកំពុងប្រព្រឹត្តឡើងនៅប្រទេសកម្ពុជាចាប់ពីថ្ងៃទី ១៨ ខែឧសភា ឆ្នាំ ២០២៥ តទៅ និង វគ្គផ្តាច់ព្រ័ត្រនឹងរៀបចំឡើងនៅថ្ងៃទី ២៦ ខែឧសភា ឆ្នាំ ២០២៥ ខាងមុខនេះ។
ជាការពិត ស្របពេលដំណើរការនៃការប្រកួត Miss Teen Icon International 2025 បវរកញ្ញាតំណាងឱ្យកម្ពុជា កញ្ញា គុណ កន្និកា កំពុងតែធ្វើឱ្យអ្នកគាំទ្រមានភាពជឿជាក់ ថានាងនឹងអាចដណ្ដើមយកតំណែង Top កំពូលណាមួយមិនខាន ខណៈសមត្ថភាព រូបសម្រស់ និង ចំណេះដឹងរបស់នាងមានទាំងព្រម។
លើសពីនោះ បើក្រឡេកទៅមើលសកម្មភាពលើបណ្តាញសង្គមនានាក្នុងកម្មវិធីប្រកួត Miss Teen Icon International 2025 គុណ កន្និកា ក៏មានការលេចធ្លោ និង ទទួលបានការគាំទ្រយ៉ាងខ្លាំងពីសំណាក់អ្នកស្នេហាវិស័យបវរកញ្ញាជាតិ និង អន្តរជាតិ៕
