បើរំឭកកាលពីពេលប្រមាណជាង ១០ ឆ្នាំ មុន អ្នកនិយមតាមដានទស្សនាភាពយន្តខ្មែរបែបរន្ធត់ ច្បាស់ធ្លាប់បានទស្សនាមកហើយនូវរឿង «ព្រលឹងខ្មោចក្រមុំ» ដោយមានការចូលរួមសម្តែងពីតារាភាពយន្តរៀមច្បងល្បីៗជាច្រើន។ ក្នុងនោះ គេក៏ចាំបានថា តួឯកស្រីក្នុងភាពយន្តខាងលើត្រូវបានសម្តែងដោយ អ្នកនាង ពេជ្រ វលក្ខណ៍។
ក្រោយសាងកេរ្តិ៍ឈ្មោះលើវិស័យភាពយន្តហើយនោះ អ្នកនាង ពេជ្រ វលក្ខណ៍ ក៏បានស្ងប់ស្ងាត់ក្នុងអាជីពសិល្បៈ និង សាងគ្រួសារ ទទួលបានចំណងដៃកូនប្រុសស្រីចំនួន ៣ រូប ហើយដែរ នាពេលបច្ចុប្បន្ន។
ដោយឡែក ថ្មីៗនេះ អ្នកលេងបណ្តាញសង្គមហ្វេសប៊ុក បានបង្ហាញការព្រួយបារម្ភនឹងសុខទុក្ខរបស់អតីតតារាសម្តែងមានប្រជាប្រិយភាព អ្នកនាង ពេជ្រ វលក្ខណ៍ ដែលបានជម្រាបពីដំណឹងសុខភាពពាក់ព័ន្ធនឹងជំងឺមហារីក។ ក្នុងនោះ បើតាមការឱ្យដឹងពីអ្នកនាង និង ស្វាមី បានបញ្ជាក់ថា ដុំសាច់មហារីកនាពេលនេះ គឺដុះនៅកន្លែងដដែល ដែលអ្នកនាងធ្លាប់បានវះកាត់កាលពីកន្លងមក។
បើទោះជាទទួលបានដំណឹងមិនល្អនេះក្តី អ្នកនាង ពេជ្រ វលក្ខណ៍ ក៏បានបង្ហាញអារម្មណ៍ដ៏ក្លាហាន នៃការជម្នះនៃជំងឺដ៏កាចសាហាវនេះ និង ទទួលបានការជូនពរជាច្រើនពីសំណាក់មហាជន ជាពិសេស អ្នកគាំទ្រអ្នកនាងផងដែរ៕
