បើរំឭកដល់តារាចម្រៀងជើងចាស់ ទូច ស៊ុននិច មហាជនជាច្រើនច្បាស់ជានឹករឭកខ្លាំងដល់ទឹកដមសំឡេងផ្អែមពីរោះរណ្ដំចិត្តរបស់អតីតតារាស្រីដ៏ល្បីល្បាញរូបនេះ ដែលបានឆក់យកបេះដូងមហាជនគ្រប់ស្រទាប់ឱ្យសញ្ជឹងស្ដាប់សំនៀងដ៏អន្លង់អន្លោចដក់ជាប់ក្នុងក្រអៅបេះដូងរហូតមក។
យ៉ាងណាមិញ ជាច្រើនឆ្នាំកន្លងទៅហើយ ដែលតារាចម្រៀងស្រី ទូច ស៊ុននិច បានឃ្លាតកាយឆ្ងាយពីវិថីសិល្បៈចម្រៀង ដោយបន្សល់នៅតែអនុស្សាវរីយ៍នៃទឹកដមសំឡេងក្នុងបទចម្រៀងចាស់ៗតែប៉ុណ្ណោះ។
ដ្បិតតែតារាចម្រៀងស្រី ទូច ស៊ុននិច មិនអាចបង្ហើរសំនៀងបម្រើអារម្មណ៍មហាជនអ្នកគាំទ្រដូចពីមុនបាន ប៉ុន្តែតារាចម្រៀងស្រីរូបនេះនៅតែរក្សាបានកេរ្តិ៍ឈ្មោះក្នុងចិត្តអ្នកគាំទ្រជំនាន់ក្រោយ ដែលតែងនឹករឭកដល់អ្នកនាង ព្រមទាំងសង្ឃឹមថាថ្ងៃណាមួយតារាចម្រៀងស្រីរូបនេះនឹងអាចវិលត្រឡប់មកកាន់វិថីសិល្បៈជាថ្មី។
ទាក់ទងនឹងការបាត់វត្តមានលើវិស័យសិល្បៈច្រើនឆ្នាំនេះដែរ កន្លងមកក៏ត្រូវបានគេដឹងថាតារាចម្រៀងស្រីរៀមច្បងរូបនេះ មានបញ្ហាសុខភាពដែលមិនអាចឈរជើងលើវិស័យនេះបានដូចពីមុន ប៉ុន្តែជារឿយៗក៏តែងឃើញគណនីហ្វេសប៊ុកឈ្មោះ Touch Sunnix បានបង្ហោះរូបភាពចាស់ៗ ក៏ដូចជាសារបង្ហាញសុខទុក្ខជាមួយអ្នកគាំទ្រជារឿយៗ។
ជាក់ស្ដែង ថ្មីៗនេះ អ្វីដែលធ្វើឱ្យមហាជនអ្នកគាំទ្រហាក់រំភើបចិត្ត ក្រោយពីបានឃើញគណនីហ្វេសប៊ុករបស់តារាចម្រៀង ទូច ស៊ុននិច បង្ហោះរូបភាពចាស់មួយសន្លឹកភ្ជាប់ជាមួយសារជូនពរឱ្យខ្លួនមានសុខភាពល្អឆាប់ៗនឹងបានវិលមកកាន់ឆាកតន្រ្តីច្រៀងជូនមហាជនវិញទៀតផង។
សារនោះ តារាចម្រៀង ទូច ស៊ុននិច បានរៀបរាប់ថា ៖ «ថ្ងៃនេះ ថ្ងៃល្អ សូមឱ្យនាងខ្ញុំមានសុខភាពល្អហើយឆាប់បានធ្វើ concert ដើម្បីច្រៀងជូនបងប្អូនទស្សនាស្ដាប់កម្សាន្តឆាប់ៗៗនេះ សូមឱ្យបងប្អូនទាំងអស់គ្នាប្រាថ្នាអ្វីៗសូមឱ្យបានសម្រេចដូចក្ដីបំណង រូបថតអនុស្សាវរីយ៍ទៅច្រៀងខួបអាពាហ៍ពិពាហ៍បងស្រីនៅ Stockton, California USA. ស្រលាញ់បងប្អូនទាំងអស់គ្នា»៕
