អ្នកគាំទ្រត្រៀមៗ! កម្មវិធី «រត់ដោយបេះដូង» លើកទី ២ របស់ សាយ ដើម្បីកុមារអូទីហ្សឹមជិតចាប់ផ្ដើមហើយ

កម្មវិធី «រត់ដោយបេះដូង-RUN BY HEART» លើកទី ២ ដែលរៀបចំឡើងដោយតារាចម្រៀង Original Song លោក សាយ ស្ថាបនិក Run With Sai កាន់តែកៀកខិតជិតមកដល់ហើយ ដោយការរត់លើកនេះ នឹងរៀបចំឡើងនាចុងខែឧសភា ឆ្នាំ ២០២៥ ខាងមុខនេះ។

កម្មវិធី «រត់ដោយបេះដូង-RUN BY HEART» បានរៀបចំលើកទី ១ កាលពីឆ្នាំ ២០២៤ ក្នុងឱកាស អបអរសាទរ «ទិវាកុមារអន្តរជាតិ» ដើម្បីប្រមូលថវិកាជួយទៅដល់ សាលាទន្សាយ ដែលជាសាលារៀនមួយមើលថែ និង បង្រៀនដល់កុមារអូទីហ្សឹម ស្ថិតក្នុងទីក្រុងភ្នំពេញ ហើយនៅក្នុងឆ្នាំ ២០២៥ នេះ ព្រឹត្តិការណ៍ «រត់ដោយបេះដូង-RUN BY HEART» លើកទី ២ នឹងរៀបចំឡើង ក្នុងគោលបំណងរៃអង្គាសថវិកាសប្បុរសធម៌ សម្រាប់អង្គការសាលារៀនទន្សាយក្នុងបេសកកម្មថែទាំ និង បង្ហាត់បង្រៀន ទៅដល់កុមារអូទីហ្សឹម (Autism) និង លើកកម្ពស់ការថែទាំសុខភាពតាមរយៈការរត់ផងដែរ។

ជាការពិត ព្រឹត្តិការណ៍ «រត់ដោយបេះដូង លើកទី ២ ឆ្នាំ២០២៥» នេះ គឺជាកម្មវិធីមួយដ៏សំខាន់សម្រាប់ការចូលរួមចំណែកមួយ នៃការជួយដល់សាលារៀនទន្សាយ ដើម្បីបន្តបេសកម្ម និង ទស្សនវិស័យមួយ នៃការជួយដល់វិស័យអប់រំដល់កុមារអូទីហ្សឹម។

ក្នុងនោះដែរ លោកស្រី សរ សុធារម្យ នាយកប្រតិបត្តិអង្គការសាលាទន្សាយ ក៏បានឱ្យដឹងថា ៖ «… Run By Heart ក្នុងឆ្នាំ ២០២៥ នេះ គឺជាឱកាសមួយ ដែលជួយផ្សព្វផ្សាយ ដល់អាណាព្យាបាលជាច្រើន សង្គមជាតិ ប្រទេសជាតិយើង ដើម្បីទទួលស្គាល់ ឬក៏អាចរួមបញ្ជូលកុមារគាត់មានតម្រូវការពិសេស និង អូទីហ្សឹម ឱ្យមានឱកាសចូលរួមក្នុងសង្គមទាំងអស់គ្នា»។

លោកស្រី សរ សុធារម្យ បានបន្តថា ៖ «បច្ចុប្បន្ននេះ អង្គការសាលារៀនទន្សាយ ក៏មានផែនការ យុត្តិសាស្ត្រជាច្រើនក្នុងការជួយដល់ពួកគាត់ តែបច្ចុប្បន្នស្ថានភាពសេដ្ឋកិច្ច ហិរញ្ញវត្ថុរបស់យើងនៅមានកម្រិត ហើយកុមារ ដែលកំពុងរង់ចាំចំនួនជាង ២០០ នាក់ គឺ កំពុងបន្តរង់ចាំទទួលសេវាកម្មអប់រំពីសាលាទន្សាយដែរ ដូច្នេះការរួមចំណែកពីមហាជន ពិតជាការរួមចំណែកដ៏ធំ ដើម្បីឱ្យពួកគាត់មានឱកាសក្នុងការចូលរួមបានទាំងអស់គ្នា»។ ជាចុងក្រោយ នាយកប្រតិបត្តិអង្គការសាលាទន្សាយ ក៏បានបន្តអំពាវនាវដល់មហាជន ចូលរួមរត់ក្នុងកម្មវិធី «រត់ដោយបេះដូង លើកទី ២ ឆ្នាំ២០២៥» ឱ្យបានច្រើនទាំងអស់គ្នា ដើម្បីរួមចំណែកជួយដល់សាលារៀនទន្សាយ។

គួរជម្រាបថា កម្មវិធី រត់ពីចម្ងាយ (Virtual Run) នឹងរៀបចំឡើង ចាប់ពីថ្ងៃទី ១ ខែឧសភា ឆ្នាំ ២០២៥ រហូតដល់ថ្ងៃទី ៣១ ខែឧសភា ឆ្នាំ២០២៥ ដោយមហាជនទូទៅ គ្រប់បណ្តាប្រទេសនានាអាចចុះឈ្មោះរត់បានទៅតាមទីតាំងរបស់ពួកគេ។ រីឯកម្មវិធីពិសេស រត់ដោយបេះដូងជាមួយកុមារអូទីហ្សឹម នឹងរៀបចំឡើងនៅថ្ងៃទី ៣១ ខែឧសភា ឆ្នាំ២០២៥ នៅពហុកីឡដ្ឋានជាតិអូឡាំពិក៕

សូមចុចទីនេះ ដើម្បីទទួលបានព័ត៌មានលម្អិត៖

សូមចុចទីនេះ ដើម្បីទស្សនាវីដេអូ៖