បញ្ហាគេបោក ជាពិសេស បោកប្រាស់ទៅលើរឿងខ្ចីលុយ ជាប្រធានបទកំពុងពេញនិយមខ្លាំងនាពេលបច្ចុប្បន្ន។ បើតាមបទសម្ភាសមួយរបស់ អ្នកឧកញ៉ាបណ្ឌិត យូ សាម៉េត លោកថា អ្នកដែលបោក មិនមែនអ្នកឆ្ងាយឯណាឡើយ គឺមានតែអ្នកនៅក្បែរខ្លួនយើងទេ ទើបបោកយើងបាន ព្រោះអ្នកដែលវៃយើងដល់ គឺអ្នកនៅជិតយើងហ្នឹងឯង។
អ្នកឧកញ៉ាបណ្ឌិត យូ សាម៉េត លើកឡើងទៀតថា អ្នកដែលចាញ់បោកគេ គឺដោយសារតែ ៤ ចំណុចគឺ ជឿគេ ទុកចិត្តគេ អាណិតគេ និង លោភលន់។ លោកបានលើកឧទាហរណ៍ដែរថា អ្នកឱ្យគេខ្ចីដោយសារលោភលន់ចង់បានការប្រាក់គេថ្លៃ ក៏ឱ្យគេខ្ចី ទាំងដែលគេយកលុយដើមមកសងជាថ្លៃការប្រាក់វិញ ចំណែកអ្នកមកខ្ចីនោះពូកែនិយាយ ធ្វើឱ្យម្ចាស់បំណុលទុកចិត្ត អាណិត ចុងក្រោយត្រូវគេបោកប្រាស់ សូម្បីរករឿងក៏មិនហ៊ាន ដោយសារតែមិត្តភាពជាមិត្តភក្តិ អ្នករាប់អានគ្នា ឬ ជាបងប្អូន។
ដូច្នេះ ដើម្បីកុំឱ្យចាញ់បោកគេ អ្នកឧកញ៉ាឱ្យយក ៤ ចំណុចខាងលើមកអនុវត្តជាបែបនេះវិញគឺ កុំជឿគេ កុំទុកចិត្តគេ កុំអាណិតគេ និង កុំលោភលន់៕
