ជាការពិតណាស់ អ្នកគាំទ្រវិស័យបវរកញ្ញាច្បាស់ជាបានជ្រាបហើយ រយៈពេលប្រមាណជាង ៥ ឆ្នាំចុងក្រោយនេះ វិស័យបវរកញ្ញាក្នុងប្រទេសកម្ពុជាកាន់តែកក្រើកខ្លាំងឡើងទាំងលើឆាកជាតិ និង ឆាកអន្តរជាតិ។ ក្នុងនោះដែរ ពីមួយឆ្នាំទៅមួយឆ្នាំ និង ពីកម្មវិធីមួយទៅកម្មវិធីមួយ គឺទទួលបានការចូលរួមពីសំណាក់បវរកញ្ញា ដែលមានសមត្ថភាពជាបន្តបន្ទាប់។
ដោយឡែក ងាកទៅកាន់វិស័យបវរកញ្ញានៅកម្ពុជាប្រមាណជាង ១០ ឆ្នាំមុន មហាជនច្បាស់ជាបានជ្រាបហើយថា បើទោះជាមានការគាំទ្រច្រើនក៏ពិតមែន ប៉ុន្តែអាចនឹងមិនទាន់ធំទូលាយដូចពេលបច្ចុប្បន្ននៅឡើយ។ យ៉ាងណាក៏ដោយ ក៏បវរកញ្ញានៅជំនាន់នោះនៅតែទទួលបានកេរ្តិ៍ឈ្មោះ និង ខ្លះឈរជើងលើវិស័យនេះដល់បច្ចុប្បន្នថែមទៀតផង។
ជាក់ស្តែង បើលើកយកបវរកញ្ញាមួយរូបក្នុងចំណោមបវរកញ្ញារៀមច្បង ដែលបានបោះជំហានក្នុងវិស័យបវរកញ្ញាតាំងពីជាង ១០ ឆ្នាំមុនមកបង្ហាញ មហាជនអាចនឹកឃើញដល់កញ្ញា ចាន់ គង្ការ ម្ចាស់ជ័យលាភី Cambodia Next Top Model រដូវកាលទី ១ កាលពីអំឡុងឆ្នាំ ២០១៤ ជាក់ជាមិនខាន។
ក្រោយទទួលបានជាប់ជ័យលាភី Cambodia Next Top Model រដូវកាលទី ១ ហើយនោះ កញ្ញា ចាន់ គង្ការ ក៏បានក្លាយទៅជាបវរកញ្ញាកម្ពុជាមួយរូប ទទួលបានតំណែងជា Face of Beauty International Cambodia 2015 តំណាងឱ្យកម្ពុជាចូលរួមការប្រកួតកម្មវិធី Face of Beauty International ក្នុងឆ្នាំ ២០១៥៕
