នៅថ្ងៃចុងសប្ដាហ៍ ថ្ងៃទី ០៤-០៥ ខែតុលា ឆ្នាំ ២០២៥ កន្លងទៅ ផ្លូវថ្មើរជើង Walk Street មានភ្ញៀវទេសចរណ៍ជាតិ និង អន្តរជាតិ មកដើរកម្សាន្តយ៉ាងច្រើនកុះករ បាននាំគ្នាគយគន់ការសម្ដែងទស្សនីយភាពសម្ដែង ស្តង់លក់អាហារ និង វត្ថុអនុស្សាវរីយ៍ បណ្ណាល័យចល័ត ព្រមទាំងសកម្មភាពកម្សាន្តសប្បាយជាច្រើនផងដែរ ដែលបង្ហាញឱ្យឃើញថា ផ្លូវថ្មើរជើង ពិតជានៅតែរក្សាបានប្រជាប្រិយភាព ពីសំណាក់អ្នកទេសចរណ៍ជាតិ អន្តរជាតិ ដើរលេងកម្សាន្តនាពេលរាត្រី។
គួរកត់សម្គាល់ផងដែរថា ចាប់តាំងពីការបើកដំណើរការផ្លូវថ្មើរជើង ដែលធ្វើឡើងនៅរៀងរាល់ថ្ងៃសៅរ៍ និង ថ្ងៃអាទិត្យកន្លងមក គេសង្កេតឃើញថា មានភ្ញៀវទេសចរចូលរួមដើរកម្សាន្តជាហូរហែពុំដែលស្ងាត់នោះឡើយ មានមនុស្សកកកុញ សប្បាយរីករាយប្រៀបបានទៅនឹងពិធីបុណ្យអុំទូក ដើរកម្សាន្តញញឹមសប្បាយរីករាយរៀងរាល់ថ្ងៃចុងសប្ដាហ៍ ចំកណ្ដាលបេះដូងរាជធានីភ្នំពេញ ដែលជាភូមិសាស្ត្រដ៏ល្អ ជាទីទាក់ទាញសម្រាប់វិស័យទេសចរណ៍។
គួរឱ្យដឹងផងដែរថា ផ្លូវថ្មើរជើង Walk Street ត្រូវបានបើកឱ្យដើរកម្សាន្តរៀងរាល់ថ្ងៃសៅរ៍ និង ថ្ងៃអាទិត្យ នៅតាមបណ្តោយវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង ក្នុងខណ្ឌដូនពេញ រាជធានីភ្នំពេញ៕
សូមទស្សនាទិដ្ឋភាពនៅខាងក្រោម ៖
