ថ្មីៗនេះ អ្នកលេងបណ្តាញសង្គមហ្វេសប៊ុក និង Tik Tok កំពុងផ្ទុះការភ្ញាក់ផ្អើល និង ចែករំលែកនូវវីដេអូមួយរបស់អតីតតារាភាពយន្តជើងចាស់ អ្នកស្រី សុខ ស្រីមុំ ដោយបានប្រើពាក្យធ្ងន់ៗប្រមាថដល់អង្គព្រះមហាក្សត្រខ្មែរ និង សម្ដេចព្រះមហាក្សត្រីយានី ជាទីសក្ការៈដ៏ខ្ពង់ខ្ពស់នៃប្រជានុរាស្ត្រខ្មែរ។
ក្នុងវីដេអូនោះ អ្នកនាង សុខ ស្រីមុំ បានប្រើពាក្យមិនគប្បីក្នុងន័យប្រមាថយ៉ាងធ្ងន់ធ្ងរដល់ អង្គព្រះមហាក្សត្រ និង សម្ដេចព្រះមហាក្សត្រីយានី ថាមិនបានយាងទៅសួរសុខទុក្ខប្រជានុរាស្ត្រនៅជំរំភៀសសឹក និង កងកម្លាំងទាហានកំពុងឈរជើងការពារបន្ទាត់ព្រំដែន។
ពាក្យសម្តីទាំងអស់នោះដែរ បានធ្វើឱ្យប្រជានុរាស្ត្រខ្មែរមិនអាចទទួលយកបាន ដោយមានអ្នកចូលបញ្ចេញមតិប្រតិកម្មជាបន្តបន្ទាប់ និង បានលើកឡើងថា អ្នកនាង សុខ ស្រីមុំ ទៅក្រៅប្រទេសយូរភ្លេចកំណើត និង ខ្លះទៀតលើកឡើងថា តារាភាពយន្តរូបនេះមិនបានដឹងព័ត៌មានក្នុងស្រុកអីបន្តិចសោះឡើយ ទើបថ្លើមធំហ៊ានប្រមាថដល់អង្គព្រះមហាក្សត្រ និង សម្ដេចហ្លួងម៉ែ។
ក្រៅពីប្រជានុរាស្រ្តផ្ទុះប្រតិកម្មមិនពេញចិត្តនឹងសម្ដីទាំងនោះ គេក៏បានឃើញអ្នកនៅក្នុងរង្វង់សិល្បៈ បានសម្តែងការខកចិត្តយ៉ាងខ្លាំងដល់អ្នកស្រី សុខ ស្រីមុំ ដែលគ្រប់គ្នាចាត់ទុកថាជាតារារៀមច្បង តែបែរជាចេញមកបង្ហោះវីដេអូមិនដឹងខុសត្រួវបែបនេះ។
ក្នុងនោះ គេបានឃើញកញ្ញា ឌួង ហ្សូរីដា និង លោក អ៊ឹម ជីវ៉ា បានចេញប្រតិកម្មភ្លាមៗមុនគេ ដោយកញ្ញា ឌួង ហ្សូរីដា បានរៀបរាប់ថា៖ «សុំផ្ញើជូនទៅអ្នកមីង «សុខ ស្រីមុំ» ដែលជាអតីតតារាសម្តែងរបស់កម្ពុជាផង! បើមីងមិនបានជួយអ្វីមួយកាក់មួយសេន ដល់ប្រជាជនខ្មែរទេ សូមមីងកុំមកប្រមាថចេស្ដា ព្រះមហាក្រត្រខ្មែរ និង សម្តេចម៉ែ ជាទីគោរពដ៏ខ្ពង់ខ្ពស់របស់ប្រជាជនខ្មែរទាំងអស់គ្នា។ ទោះបីលោកមិនអាចយកអំណោយទៅចែកជូនប្រជាជនផ្ទាល់ ប៉ុន្តែសូមបើកភ្នែកមើលឱ្យច្បាស់ថា ទាំងនេះព្រះរាជអំណោយរបស់ព្រះអង្គទាំងទ្វេចែកជូនកូនចៅប្រជារាស្រ្តកម្ពុជានៅខេត្តឧត្តរមានជ័យ មុនថ្ងៃ ៣០ កក្កដា ២០២៥ មកម្ល៉េះ ក្នុងនោះ ក៏នៅមានព្រះរាជឧបត្ថម្ភជូនដល់ស្ថាប័នផ្សេងៗក្នុងបុព្វហេតុបារម្ភពីសុខទុក្ខកូនចៅគ្រប់ពេល។
ផ្តាំទៅអ្នកប្រឆាំងផ្កាប់មុខទាំងអស់ផង! កុំពូកែតែខាងចាប់កំហុសខ្មែរគ្នាឯង ទាំងដែលខ្លួនឯងមិនបានជួយអ្វីបន្តិចសោះដល់ប្រជាជាតិមាតុភូមិ! បើពូកែណាស់ សូមផ្តល់ជំនួយដូចជាស្បៀង អាវក្រោះ ថវិកា មកក៏បាន យកមកជូនបងប្អូនភៀសសឹក ពូៗវីរកងទ័ពឱ្យស្រុះគ្នាដូចប្រជារាស្រ្តសាមញ្ញធម្មតា សូម្បីតែលោកតា លោកយាយ ជាអ្នកសុំទាន រស់មួយថ្ងៃដើម្បីមួយថ្ងៃ ក៏គាត់មានទឹកចិត្តយកលុយ ដែលសុំគេបានមកចូលរួមជួយកងទ័ពដែរ។ ចុះពួកអ្នកឯងវិញ ជួយអ្វីបានខ្លះហើយ ក្រៅពីស្រែកជំទាលពីក្រៅប្រទេស ឱ្យអន្តរជាតិឃើញតែភាពអវិជ្ជមានរបស់ជាតិសាសន៍ខ្លួនឯងនោះ? ឈប់បាន ឈប់ទៅ ពូមីងជ្រុលនិយមទាំងឡាយ»។
ដោយឡែក ងាកមកលោក អ៊ឹម ជីវ៉ា ឯណោះវិញ ក៏បានលើកឡើងយ៉ាងខ្លីថា៖ «វាដៀលអង្គព្រះមហាក្សត្រនៅមានពួកអាឈាមឆ្កែ មីឈាមឆ្កែចេញមុខការពារទៀត ពួកហែ្ហងប្រមាថព្រះមហាក្សត្រ ពួកនាងឯងនឹងរលាយឆាប់ៗនេះ»។
គួរបញ្ជាក់ថា ក្រោយបង្ហោះវីដេអូមិនបានប៉ុន្មាន គេសង្កេតឃើញថា អ្នកនាង សុខ ស្រីមុំ បានលុបវីដេអូនោះចោលវិញ តែទោះជាយ៉ាងនេះក្ដី វីដេអូនោះត្រូវបានសាយភាយជាបន្តបន្ទាប់ទៅហើយ ពេញក្នុងបណ្តាញសង្គម Tik Tok និង ហ្វេសប៊ុក ជាមួយនឹងការបញ្ចេញមតិប្រតិកម្មរិះគន់យ៉ាងខ្លាំងពីសំណាក់មហាជនដល់តារាភាពយន្តជើងចាស់ សុខ ស្រីមុំ។
យើងខ្ញុំសុំអធ្យាស្រ័យក្នុងការបង្ហាញវីដេអូ ដោយសារក្នុងខ្លឹមសារវីដេអូ អ្នកនាង សុខ ស្រីមុំ បានប្រើពាក្យមិនសមរម្យប្រមាថចំពោះអង្គព្រះមហាក្សត្រខ្មែរ និង សម្តេចហ្លួងម៉ែ៕
សូមចុចទីនេះ ដើម្បីទស្សនាវីដេអូ៖
