អ៊ឹម ជីវ៉ា ថា បើជារឿងពិត មានតែជូនពរមិត្តសម្លាញ់ មាស សុខសោភា ពាក់ព័ន្ធទំនាក់ទំនងស្នេហាជាមួយតាសក់សភ្នំត្បែង

ជុំវិញរឿងរ៉ាវឯកជនរបស់កំពូលតារាចម្រៀងស្រី មាស សុខសោភា ថ្មីៗនេះ លើហ្វេសប៊ុកមហាជនបានផ្ទុះចាប់អារម្មណ៍ចែករំលែកជាថ្មី ពាក់ព័ន្ធនឹងទំនាក់ទំនងរវាងអ្នកនាង ជាមួយនឹងតាសក់សភ្នំត្បែង ដោយកាន់តែមានការភ្ញាក់ផ្អើលខ្លាំង ក្រោយទទួលដំណឹងថាតាសក់សភ្នំត្បែងរូបនោះ ប្រកាសលើហ្វេសប៊ុកថាជាស្វាមីរបស់អ្នកនាង។

ក្នុងនោះ តាមរយៈហ្វេសប៊ុកផេក អង្គមហាឦស្វរៈសិវមោក្ខ-ពេជ្រ សង្វារវង្ស ហៅ លោកតាសក់សភ្នំត្បែង បានធ្វើការឡាយវីដេអូរយៈពេលជាង ២ ម៉ោង ដែលនៅត្រង់ចំណុចនាទីទី ១:0៨:00 លោកបានប្រកាសច្បាស់ៗពីទំនាក់ទំនងរវាងលោក និង កំពូលតារាចម្រៀង មាស សុខសោភា ដោយជាការឆ្លើយតបបញ្ជាក់ការសង្ស័យរបស់មហាជនកន្លងមក ឱ្យដឹងថាលោក គឺស្វាមីបច្ចុប្បន្ន របស់កំពូលតារាចម្រៀង មាស សុខសោភា ទៀតផង។

ស្របពេលលើបណ្ដាញហ្វេសប៊ុកកំពុងផ្ទុះចែករំលែកខ្លាំងជុំវិញរឿងខាងលើ ក៏បានឃើញលោក អ៊ឹម ជីវ៉ា ក្នុងនាមជាមិត្តសម្លាញ់របស់កំពូលតារាចម្រៀង មាស សុខសោភា បានបង្ហោះរូបភាពជាមួយអ្នកនាងបង្ហាញការលើកទឹកចិត្ត ក៏ដូចជាជូនពរ ដែលលោកថាបើជារឿងពិត គឺលោកមានតែជូនពរឱ្យមិត្តសម្លាញ់មានសុខសុភមង្គល និង ស្រឡាញ់គ្នារហូតទៀតផង។

សារនោះ លោក អ៊ឹម ជីវ៉ា បានបង្ហោះរៀបរាប់ថា ៖ «បើជារឿងពិត មានតែជូនពរឱ្យសម្លាញ់ មាស សុខសោភា បានសុខសុភមង្គល ស្រលាញ់គ្នារហូត! ស្នេហា គឺជាការស្រលាញ់ជ្រើសរើសដោយខ្លួនឯង មិនអាចមានអ្នកណាមកបង្ខំបានឡើយ ហើយកុំខ្វល់ពីមាត់អ្នកដទៃ ចង្កៀងផ្ទះអ្នកណាភ្លឺផ្ទះអ្នកនោះ សំខាន់ឱ្យតែមានសេចក្តីសុខផ្លូវចិត្តបានហើយ។ ខ្ញុំនៅតែគាំទ្រមិត្តជានិច្ច អំពើល្អមិនសាបសូន្យ ដោយក្តីគោរពៈ អ៊ឹម ជីវ៉ារុងរឿង»៕