ស្របពេល ដែលព្រះរាជាណាចក្រកម្ពុជាកំពុងជួបប្រទះបញ្ហាតាមបន្ទាត់ព្រំដែន ដោយមានការប៉ះទង្គិចគ្នារវាងកងទ័ពកម្ពុជា និង កងទ័ពថៃ កាលពីព្រឹកថ្ងៃទី ២៨ ខែឧសភា ឆ្នាំ ២០២៥ នៅក្នុងភូមិសាស្រ្ត ភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ បណ្ដាលឱ្យកងទ័ពមួយរូប បានពលីនៅក្នុងព្រឹត្តិការណ៍នេះ គេឃើញប្រជាជនកម្ពុជាកាន់តែយកចិត្តទុកដាក់យ៉ាងខ្លាំង។
ក្នុងនោះ ក៏មានការស្រុះដៃគ្នាពីប្រជាពលរដ្ឋខ្មែរបាន និង កំពុងប្រមូលថវិកា កៀរគរសប្បុរសជនចូលរួមជាបច្ច័យដល់គ្រួសារនៃសព និង កៀរគរថវិកាពីសប្បុរសជនឱ្យមានការចូលរួមឧបត្ថម្ភជាគ្រឿងឧបភោគ បរិភោគ និង សម្ភារៈផ្សេងៗ ជូនដល់កងទ័ពជួរមុខដែលកំពុងឈរជើងការពារតាមបន្ទាត់ព្រំដែនផងដែរ។ យ៉ាងណាក៏ដោយ ថ្មីៗនេះ នាយកដ្ឋានប្រឆាំងបទល្មើសបច្ចេកវិទ្យា ក៏បានអំពាវនាវដល់សាធារណជនមេត្តាប្រុងប្រយ័ត្នខ្ពស់ចំពោះការចូលរួមថវិកាផ្សេងៗ ក្នុងនាមជាសប្បុរសជន ក្រោមរូបភាពកៀរករថវិកា ដែលគ្មានប្រភពផ្លូវការច្បាស់លាស់។
ដោយឡែក ក្រឡេកទៅមើលអតីតតារាចម្រៀងស្រី អ្នកនាង អែនជី និង ស្វាមី ព្រមទាំងមិត្តភក្តិឯណោះវិញ ក៏បានចូលរួមចំណែកនៃការកៀរគរថវិកាជូនដល់កម្លាំងកងទ័ពដូចគ្នាដែរ ដោយអ្នកនាង បានចុះទៅដល់ខេត្តព្រះវិហារដោយផ្ទាល់តែម្តង។
ក្នុងនោះ អ្នកនាង អែនជី និង ស្វាមី ព្រមទាំងមិត្តភក្តិ បានដឹកជញ្ជូនគ្រឿងឧបភោគ បរិភោគ និង សម្ភារៈផ្សេងៗ ដែលមានការរួមចំណែកពីថវិការបស់អ្នកនាង និង មិត្តភក្តិ ព្រមទាំងសប្បុរសជនពីទីក្រុងភ្នំពេញទៅកាន់ខេត្តព្រះវិហារនៅទីតាំងកងវរសេនាតូចលេខ ៤៤៦៕
