ជារឿងដ៏គួរឱ្យសោកសង្រេង នៅថ្ងៃទី ២៤ ខែសីហា ឆ្នាំ ២០២៥ ឧទ្យានសួនសត្វព្រៃការពារ និង សួនភូតគាម ភ្នំតាម៉ៅ នៃរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និង នេសាទ បានជូនដំណឹងអំពីការស្លាប់ដំរីញីជាទីស្រឡាញ់ឈ្មោះ «ឡាក់គី» នៅព្រឹកថ្ងៃអាទិត្យ ទី ២៤ ខែសីហា បន្ទាប់ពីធ្លាក់ខ្លួនឈឺភ្លាមៗកាលពីល្ងាចថ្ងៃសុក្រកន្លងទៅ។
ក្រោយបាត់បង់ដំរីដែលបានចំណាយពេល ២៦ ឆ្នាំ នៅជាមួយច្រើនជាងគ្រួសារ នៅព្រឹកថ្ងៃទី ២៥ ខែសីហា ឆ្នាំ ២០២៥ នេះ លោក ទ្រី ស៊ីថេង បានបង្ហោះវីដេអូចុងក្រោយជាមួយដំរីឡាក់គី កាលពីនាងនៅមានជីវិត ពោលគឺក្នុងថ្ងៃសៅរ៍ទី ២៣ ខែសីហា ឆ្នាំ ២០២៥ មុននឹងបាត់បង់ជីវិតមួយថ្ងៃ ដែលស្ថានភាពឡាក់គីហាក់នៅរឹងមាំនៅឡើយ ស្មានមិនដល់ថាត្រូវបាត់បង់ជីវិតក្នុងពេលដ៏ខ្លីបែបនេះ ដោយលោក ទ្រី ស៊ីថេង បានបញ្ជាក់សារលើវីដេអូថា ៖ «នេះជាវីដេអូថ្ងៃសៅរ៍ ទី ២៣ ខែសីហា ឆ្នាំ ២០២៥ ឡាក់គី ហេតុអីកូនឈឺស្លាប់លឿនម្ល៉េះ??»។
គួរឱ្យដឹងផងដែរថា ចំពោះការបាត់បង់ដំរីឡាក់គី ក្នុងអាយុ ២៦ ឆ្នាំ ឧទ្យានសួនសត្វព្រៃការពារ និង សួនភូតគាម ភ្នំតាម៉ៅ បានបញ្ជាក់ឱ្យបានដឹងថា ក្រុមពេទ្យសត្វរបស់ឧទ្យានសួនសត្វព្រៃបានផ្តល់ការព្យាបាលយ៉ាងយកចិត្តទុកដាក់ខ្ពស់បំផុត ប៉ុន្តែទោះបីជាបានប្រឹងប្រែងព្យាយាមអស់ពីសមត្ថភាពក៏ដោយ ក៏នៅតែមិនអាចជួយសង្គ្រោះជីវិតរបស់ឡាក់គីបាន ដែលក្នុងនោះ លោកទ្រី ស៊ីថេង ដែលជាហ្មរបស់ឡាក់គី ក៏បានបន្តជួយថែទាំ «ឡាក់គី» បើទោះបីជាបានចាកចេញពី Wildlife Alliance ហើយ ក៏មានវត្តមាននៅជាប់ជាមួយ ឡាក់គី នៅពេលមានអាការៈជំងឺផងដែរ៕
