រយៈពេលប្រមាណជា ១៤ ឆ្នាំហើយ ដែល នាយ ពាក់មី បានផ្លាស់ប្ដូរវាសនា ពីអ្នកធ្វើការសំណង់មានជីវភាពធម្មតា មកជាតារាកំប្លែងប្រចាំប្រទេស ទទួលបានកេរ្តិ៍ឈ្មោះល្បាញល្បី មានទស្សនិកជនស្រឡាញ់ពេញចិត្ត ហើយតាមរយៈនោះ នាយ ពាក់មី ក៏បានផ្លាស់ប្ដូរជីវភាពទាំងស្រុង ដោយមានលទ្ធភាពរស់នៅក្នុងផ្ទះធំទ្រនំខ្ពស់ មានលុយ មានឡានទំនើប ហើយមិនតែប៉ុណ្ណោះ លោកថែមទាំងសង់ផ្ទះជូនឪពុកម្ដាយទាំងសងខាងនៅឯស្រុកកំណើតយ៉ាងធំប្រណីតទៀតផង។
បើត្រឡប់ទៅកាន់អតីតកាលបន្តិច ដូចប្រិយមិត្តភាគច្រើនបានជ្រាបហើយថា នាយ ពាក់មី ជាសិល្បករមានពន្លកកើតចេញពីកម្មវិធីប្រកួតកំប្លែងមួយក្នុងអំឡុងឆ្នាំ ២០១០ ហើយកាលនោះ លោកទទួលបានជ័យលាភីលេខ ១ ក្លាយជាតារាកំប្លែងប្រចាំស្ថានីយទូរទស្សន៍ CTN ។ ចំណែកឯគណៈកម្មការ ៣ រូប ដែលបានកំណត់វាសនាឱ្យ នាយ ពាក់មី ក្លាយជាម្ចាស់ពាន់រង្វាន់ គឺមានតារាកំប្លែងជើងចាស់ នាយកុយ, ឧកញ៉ា ឃ្លោក និង តារាកំប្លែង គ្រត ដែលរៀមច្បងសិល្បៈ ៣ រូបនេះ គឺជាគណៈកម្មការក្នុងការប្រឡងកាលនោះ។
ដ្បិតថាពេលវេលាកន្លងផុតច្រើនឆ្នាំ ប៉ុន្ដែជារឿយៗ នាយ ពាក់មី តែងដឹងគុណចំពោះរៀមច្បងទាំង ៣ រូបខ្លាំងបំផុត ហើយរៀមច្បងមួយរូប ដែលបានដាក់ឈ្មោះឱ្យលោកថា ពាក់មី រហូតមានការទទួលស្គាល់ដល់បច្ចុប្បន្ន គឺអ្នកនាង កាតុ។ រៀមច្បងក្នុងសិល្បៈទាំងប៉ុន្មានរូបនេះ នាយពាក់មី តែងរំឭកដឹងគុណមិនភ្លេច ពេលលោកចូលរួមក្នុងកម្មវិធីណា តែងលើកពីឈ្មោះរៀមច្បងទាំងអស់មកបង្ហាញប្រាប់មហាជនជារឿយៗ៕
