ស្នេហាក្នុងសម័យឌីជីថល ២០២៥ បើចង់ឱ្យទំនាក់ទំនងមានសុវត្ថិភាព ត្រូវស្រលាញ់គ្នាដូចជាការធ្វើអាជីវកម្ម ហ៊ានចាយលុយ បានបេះដូង ហ៊ានជះលុយ បានគង់វង្ស។ បើតាមវេជ្ជបណ្ឌិត Eliza Filby អ្នកស្រាវជ្រាវមនុស្សតាមជំនាន់បានលើកឡើងថា ទ្រព្យសម្បត្តិបានក្លាយជាផ្នែកដ៏សំខាន់នៅក្នុងទំនាក់ទំនងអាពាហ៍ពិពាហ៍សម្រាប់មនុស្សជំនាន់ថ្មី។
វេជ្ជបណ្ឌិតរូបនេះនិយាយទៀតថា ស្នេហាក្មេងៗសម័យនេះ គេមិនត្រឹមតែរើសដៃគូដោយផ្អែកទៅលើគីមីវិទ្យាទៀតនោះទេ តែគេផ្អែកទៅលើស្ថានភាពហិរញ្ញវត្ថុ ទ្រព្យសម្បត្តិគ្រួសារ ក៏ដូចជាលំដាប់គ្រួសារនៅក្នុងសង្គម។ ជាក់ស្តែង ដូចនៅសហរដ្ឋអាមេរិក កាលពីមុនក្មេងៗធំពេញវ័យ ចាកចេញពីផ្ទះរស់នៅឯករាជ្យ រៀបការ និង ចិញ្ចឹមកូនដោយខ្លួនឯង តែឥលូវនេះអ្វីៗគ្រប់យ៉ាងមានតម្លៃថ្លៃ ដែលធ្វើឱ្យមនុស្សវ័យក្មេង មិនអាចធ្វើវាបានដោយគ្មានការជួយជ្រោមជ្រែងពីគ្រួសារ។
វេជ្ជបណ្ឌិតរូបនេះ បន្ថែមទៀតថា វាមិនភ្ញាក់ផ្អើលឡើយ ដែលក្មេងជំនាន់ Gen Z កាន់តែច្រើនឡើង មានតម្រូវការទំនាក់ទំនងមិនត្រឹមតែស្នេហាប៉ុណ្ណោះទេ តែថែមទាំងត្រូវមានលទ្ធភាពអាចឱ្យពួកគេពឹងផ្អែកជីវិតរយៈពេលវែងផងដែរ។
បើតាម Amber Brooks និពន្ធនាយកនៃគេហទំព័រប្រឹក្សាការណាត់ជួបដៃគូ DatingNews.com បានប្រាប់សារព័ត៌មាន The Post ថា ក្មេងជំនាន់ Gen Z មិនខ្លាចឡើយក្នុងការសួរចំៗទៅកាន់នរណាម្នាក់ ដែលកំពុងចែចង់ពួកគេ។ ពួកគេចង់ដឹងពីអ្វីដែលអ្នកមាន មុនពេលសួរអំពីពណ៌អ្វីដែលអ្នកចូលចិត្ត។ ពួកគេសង្កេតច្បាស់លាស់អំពីអាជីពឬរបៀបរស់នៅរបស់ដៃគូ ដែលមានឥទ្ធិពលលើអនាគតរបស់ពួកគេ។ និយាយរួម ពួកគេក្មេង តែមានយុទ្ធសាស្ត្រខ្ពស់។
ជារួមមក ក្មេងជំនាន់ Gen Z សព្វថ្ងៃ ពួកគេមិនចង់បានដៃគូ ដែលស្រលាញ់ប្តូរផ្តាច់នោះទេ តែជាដៃគូស្នេហា ដែលអាចយឹតយោងគ្នាដូចជាដៃគូអាជីវកម្ម៕
ប្រភព៖ NYC
