អាយុ ៣០ ប្លាយ មាន សូនីតា ត្រូវគេសួរដេញដោល ២ សំណួរដដែល ជាពិសេសពីទំនាក់ទំនងបេះដូងនឹងតារាប្រុសសង្ហាម្នាក់នេះ

និយាយពីកញ្ញា មាន សូនីតា បើគិតត្រឹមឆ្នាំ ២០២៦ ខាងមុខនេះ រាជិនីក្រមា រូបនេះមានវ័យ ៣៦ ឆ្នាំ ហើយ ប៉ុន្តែបើនិយាយពីរូបសម្រស់ឯណោះវិញ ហាក់មិនជ្រេទៅតាមវ័យសោះ ខណៈអតីត Freshie Girl រូបនេះ នៅតែស្រស់សោភា សម្រស់នៅចាំមិនដើរតាមអាយុសោះ។

ដោយឡែក ឈានចូលវ័យជិត ៣៦ ឆ្នាំហើយនោះ មហាជន ដែលនិយមតាមដានពីរឿងរ៉ាវឯកជនរបស់កញ្ញា មាន សូនីតា ក៏ធ្លាប់បានដឹងខ្លះហើយថា ស្រីស្អាតរូបនេះ មិនដែលបង្ហើបពីម្ចាស់បេះដូងម្តងណាឡើយ ដោយកន្លងមកបានត្រឹមតែមានអ្នកគាំទ្រចាប់ផ្គូផ្គងកញ្ញានឹងតារាប្រុសដទៃ។ ម្យ៉ាងវិញទៀតនោះ ថ្មីៗនេះ មហាជនបានត្រឹមសង្ស័យនឹងទំនាក់ទំនងរវាងនាង និង លោក សេង មង្គល បន្ទាប់ពីបានឃើញរូបភាព និង វីដេអូស្និទ្ធស្នាល ប៉ុន្តែការពិតរូបភាព និង វីដេអូនោះ គឺជាការថតផ្សព្វផ្សាយពាណិជ្ជកម្មប៉ុណ្ណោះ។

យ៉ាងណាមិញ ស្រាប់តែថ្មីៗនេះ កញ្ញា មាន សូនីតា បានបង្ហោះសារ ហាក់បង្ហាញពីអារម្មណ៍ក្នុងចិត្តរបស់ខ្លួន បន្ទាប់ពីត្រូវបានគេចោទជាសំណួរដដែលៗមិនឈប់។ ក្នុងនោះ កញ្ញា មាន សូនីតា មិនបានលម្អិតពីអារម្មណ៍នោះឡើយ គ្រាន់តែបានបង្ហោះសំណួរ ដែលគេតែងសួរជារឿយៗថា៖ «សំណួរមុនគេ គឺកាលយកប្តី? សំណួរទី២ ៖ ជាមួយលោក មង្គល ជារឿងពិតមែនដែរទេ?»៕