សម្រាប់បុរសអាយុ ២៥ ឆ្នាំឡើង ជាវ័យមួយ ដែលកំពុងមមាញឹកនឹងដំណើរកសាងជីវិត ខណៈដែលបុរសមួយចំនួនធំ ក៏បានសម្រេចចិត្តរៀបការកសាងគ្រួសារផងដែរ។ ការចាប់ផ្តើមជីវិតគូពិតជារឿងសំខាន់ តែអ្វីដែលកាន់តែសំខាន់ទៀតនោះ មុនពេលរៀបការ បុរសគប្បីត្រៀមខ្លួនឱ្យរួចរាល់ រាប់តាំងពីទំនួលខុសត្រូវ ចិត្តគំនិត និង ស្ថានភាពហិរញ្ញវត្ថុ….ជាដើម។ យើងសូមលើកពីចំណុចសំខាន់ ៤ យ៉ាង ដែលបុរសៗគួរត្រៀមខ្លួនឱ្យរួចរាល់មុនពេលរៀបការ ពុំដូច្នោះរៀបការហើយអាចនឹងជួបវិបត្តិច្រើន ឬមានអារម្មណ៍ស្រឡះដៃធេងមិនខាន។
១. ភាពចាស់ទុំ
ចាស់ចិត្តចាស់គំនិត បោះបង់ភាពឆេវឆាវ អាចឱ្យអ្នកយល់ និង គ្រប់គ្រងអាម្មរណ៍ទាំងខ្លួនឯងផង និង យល់ពីចិត្តដៃគូផងដែរ។ ភាពចាស់ទុំខាងចិត្តគំនិត មានប្រសិទ្ធភាពជួយរក្សាទំនាក់ទំនងយូរអង្វែង អាចដោះស្រាយបញ្ហាលំបាក និង កសាងឱ្យទំនាក់ទំនងស្និទ្ធស្នាល។
២. ស្ថិរភាពហិរញ្ញវត្ថុ និង ទំនួលខុសត្រូវ
មិនថាស្រលាញ់គ្នាខ្លាំងប៉ុនណា បើមានបញ្ហាស្ត្រេសផ្នែកហិរញ្ញវត្ថុ មិនយូរមិនឆាប់ វាអាចបង្កជាជម្លោះឬចម្រូងចម្រាសនៅក្នុងជីវិតប្តីប្រពន្ធ។ ការមានលំនឹងហិរញ្ញវត្ថុ និង ប្រាកដទំនួលខុសត្រូវ អាចឱ្យអ្នកធានាបាននូវការផ្តត់ផ្គង់គ្រួសារ ក៏ដូចជាធ្វើការរួមគ្នាដើម្បីសម្រេចគោលដៅហិរញ្ញវត្ថុ។
៣. ខ្លាំងខាងទំនាក់ទំនង
ក្រោយរៀបការ អ្នកនឹងត្រូវមានទំនាក់ទំនងជាមួយគ្រួសារខាងស្រី។ បើមិនក្លាហាន មិនពូកែទំនាក់ទំនង ពិន្ទុក្លាយជាស្វាមីល្អនឹងធ្លាក់ចុះ គ្រួសារខាងស្រីនឹងមិនសូវឱ្យតម្លៃ អាចចាត់ទុកអ្នកជាមនុស្សមិនចុះចំណោមគ្រួសារគេ។ ចងចាំថា ការពូកែទំនាក់ទំនងគឺគ្រឹះដ៏រឹងមាំ ធ្វើឱ្យជីវិតអាពាហ៍ពិពាហ៍ជោគជ័យ។
៤. មានគោលដៅរួមគ្នា
ដើរលើវិថីតែមួយ អ្នក និង ដៃគូត្រូវតែមានគោលដៅជីវិតស្របគ្នា រាប់តាំងពីការកសាងគ្រួសារ អាជីព របៀបរស់នៅ និង ការអភិវឌ្ឍន៍ខ្លួន។ វាពិតជាចាំបាច់ ដែលតម្រូវឱ្យអ្នកស្វែងយល់ចិត្តគ្នាឱ្យបានច្បាស់សិន សឹមសម្រេចចិត្តរៀបការ។ កាលណាមានគោលដៅតែមួយ ដំណើរជីវិតអាពាហ៍ពិពាហ៍នឹងកម្រជួបឧបសគ្គ ហើយបើចង់បានអ្វីមួយ ក៏ឆាប់ជោគជ័យលឿន៕
