បើគិតមកដល់ពេលនេះ រយៈពេលប្រមាណកន្លះឆ្នាំមកហើយ ដែលតារាចម្រៀងសំឡេងស្រទន់ដ៏ស្រស់សង្ហា លោក ខាយ បានដឹកដៃកូនក្រមុំអ្នកខេត្តសៀមរាប គឺអ្នកនាង មុន្នីនាថ រៀបការសាងគ្រួសារយ៉ាងមានសុភមង្គលកាលពីអំឡុងខែមីនា ឆ្នាំ ២០២៥ កន្លងទៅ។
ក្នុងនោះដែរ ក្រោយរៀបការរួច មហាជនបានឃើញថា គូស្វាមីភរិយាខាងលើ កាន់តែមានសុភមង្គល និង ជោគជ័យខ្លាំងក្នុងការងារទាំងក្នុង និង ក្រៅសិល្បៈ ដោយមួយរយៈក្រោយនេះ អ្នកនាង មុន្នីនាថ បានបង្ហាញវត្តមានក្នុងការសម្តែងជាមួយស្វាមី និង ក្លាយទៅជាទូតសុឆន្ទៈរបស់ក្រុមហ៊ុនមួយចំនួនទាំងគូទៀតផង។
ងាកទៅកាន់ ភរិយាលោក ខាយ ឯណោះវិញ ច្បាស់ជាមហាជនបានជ្រាបហើយថា អ្នកនាង មុន្នីនាថ គឺមានវ័យត្រឹម ២០ ឆ្នាំប៉ុណ្ណោះ ប៉ុន្តែអ្វីដែលគួរឱ្យសរសើរនោះ បើទោះជាអ្នកនាង មុន្នីនាថ នៅក្មេងវ័យក៏ពិតមែន ប៉ុន្តែអ្នកនាងមានគំនិតចាស់ទុំ មានមុខរបរក្នុងដៃជាច្រើនទៀតផង។ ជាក់ស្តែង បច្ចុប្បន្ន អ្នកនាង មុន្នីនាថ មានហាងលក់វែនតា នៅក្នុងទីរួមខេត្តសៀមរាប ព្រមទាំងមានហាងផ្កា លក់សម្លៀកបំពាក់ និង លក់ផលិតផលអនឡាញថែមទៀតផង៕
