នៅរសៀលថ្ងៃទី ១១ ខែមីនា ឆ្នាំ ២០២៥ នេះ នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ បានបញ្ជាក់ជូនអំពីសំណុំរឿងឃាតកម្មប្ដីសម្លាប់ប្រពន្ធ យកសពបោះចោលនៅខណ្ឌឫស្សីកែវ ហើយកម្លាំងនាយកដ្ឋាននគរបាលព្រហ្មទណ្ឌ ស្រាវជ្រាវរកឃើញប្ដីចងកសម្លាប់ខ្លួនតាមក្រោយ នៅខេត្តបន្ទាយមានជ័យ។
ទាក់ទិនទៅនឹងរឿងនេះ នាយកដ្ឋាននគរបាលព្រហ្មទណ្ឌ បានឱ្យដឹងថា នៅថ្ងៃទី ១០ ខែមីនា ឆ្នាំ ២០២៥ នៅវេលាម៉ោង ០៧៖០៥ នាទី មានករណីប្រទះឃើញសាកសពស្រ្តីម្នាក់ នៅចំណុចដីឡូតិ៍ទុកចោល ផ្លូវឧកញ៉ាឌីប៉ូ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។ ជនរងគ្រោះមានឈ្មោះ អ៊ុន ស្រីល័ក ភេទស្រី អាយុ ២៥ ឆ្នាំ ជនជាតិខ្មែរ។ បង្កឡើងដោយជនសង្ស័យជាប្តីមានឈ្មោះ ប៊ុន សេងហាប់ ភេទប្រុស អាយុ ៣០ ឆ្នាំ ជនជាតិខ្មែរ ។
ក្រោយពីមានហេតុការណ៍ខាងលើកើតឡើង កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន វរសេនីយ៍ឯក ហែម បូណា និង វរសេនីយ៍ឯក ឆាន់ គីមលី អនុប្រធាននាយកដ្ឋាន បានដឹកនាំសហការជាមួយកម្លាំងជំនាញរបស់ស្នងការដ្ឋាននគរបាលខេត្តបន្ទាយមានជ័យ ធ្វើការស្រាវជ្រាវករណីខាងលើ ដោយបានដឹងថា ជនសង្ស័យកំពុងរត់គេចខ្លួនទៅកាន់ស្រុកកំណើតនៅឯខេត្តបន្ទាយមានជ័យ។ បន្ទាប់មកជនសង្ស័យ បានធ្វើអត្តឃាតដោយចងកសម្លាប់ខ្លួនឯង នៅវេលាម៉ោង ២០៖០០ នាទី ត្រង់ចំណុចភូមិអូស្វាយ ឃុំតាគង់ ស្រុកម៉ាឡៃ ខេត្តបន្ទាយមានជ័យ៕
