នៅក្នុងវិស័យផាត់មុខ ឱ្យតែនិយាយដល់ឈ្មោះ ណារ៉ាក់ នរណាដែលថាមិនស្គាល់! ពិតណាស់ លោកគឺជាសិល្បករផាត់មុខដ៏ជំនាញ និង ជាជាងកាត់សក់ដ៏មានទេពកោសល្យមួយរូប។ ដោយសារទឹកដៃខ្លាំង ភ្ញៀវពេញចិត្តស្នាដៃលោកសុទ្ធតែតារាល្បីៗ ជាពិសេស អភិជន និង បុគ្គលមានមុខមាត់នៅក្នុងសង្គម។ ដូចឃើញជាក់ស្តែង លោកជំទាវ យឹម ឆៃលីន ក៏ជាភ្ញៀវប្រចាំរបស់លោកផងដែរ។
មានឈ្មោះពេញថា ប្រាង សំអាតវីណារ៉ាក់ លោកច្រើនត្រូវបានគេហៅ ណារ៉ាក់ ដែលជាឈ្មោះល្បីល្បាញនៅក្នុងវិស័យផាត់មុខនៅកម្ពុជា។ ជាអ្នកបង្ហាត់បង្រៀនផ្នែកសម្រស់ផងនោះ នៅក្នុងឆ្នាំ ២០១៦ លោកបានបើកសាឡនផ្ទាល់ខ្លួន Narak Inside Beauty Salon ដែលមានទីតាំងនៅក្រោយព្រះបរមរាជវាំង។
ឆ្លងកាត់បទពិសោធ លោកថាភាពស្ទាត់ជំនាញឬចេះគ្រប់សព្វ គឺជាជំនាញមួយដ៏មានសារសំខាន់។ លោកថាជាសិល្បករផាត់មុខ ត្រូវតែចេះសម្របទៅតាមភាពខុសគ្នានៃទម្រង់មុខ ពណ៌សម្បុរស្បែក និង ចំណង់ចំណូលចិត្តរបស់អតិថិជន។ លើសពីនេះត្រូវមានភ្នែកឈ្លាសវៃចំពោះការលម្អិត និង ស្តាប់ ហើយយល់ពីចក្ខុវិស័យរបស់អតិថិជន។ តិចនិចជាផ្នែកសំខាន់ ប៉ុន្តែការភ្ជាប់ទំនាក់ទំនងជាមួយអតិថិជន និង យល់ពីតម្រូវការរបស់ពួកគេក៏មានសារសំខាន់ដូចគ្នា។
ចំពោះការផាត់ទៅលើប្រភេទស្បែក និង ពណ៌សម្បុរ អ្នកជំនាញសង្ហារូបនេះ បានបង្ហើបថា លោកតែងចាប់ផ្តើមជាមួយការប្រើផលិតផលរក្សាសម្រស់ដែលត្រឹមត្រូវ ដោយលាប Primer និង ផលិតផលផ្តល់សំណើមទៅតាមប្រភេទស្បែករបស់ភ្ញៀវ។ លោកផ្តោតប្រើផលិតផលផ្តល់ជាតិទឹកសម្រាប់អ្នកស្បែកស្ងួត រីឯស្បែកប្រេង លោកប្រើប្រភេទស្ងួតឬ matte ដែលគ្រប់គ្រងភាពភ្លឺរលោង។ ដើម្បីឱ្យត្រូវពណ៌ស្បែក លោកលាយម្សៅទ្រនាប់ឬ foundation ជាមួយ concealer។ លោកផាត់ស្រមោលលាយគ្នា ដើម្បីឱ្យមើលមកប្រដេញស្មើឃើញធម្មជាតិស្អាត។
ប្រឡូកវិស័យផាត់មុខច្រើនឆ្នាំ អ្វីដែលធ្វើឱ្យលោករីករាយបំផុតនឹងអាជីពមួយនេះ គឺលោកចូលចិត្តឃើញការផ្លាស់ប្តូរសម្រស់ ដោយសារការផាត់មុខអាចផ្លាស់ប្តូររូបសម្រស់របស់មនុស្សម្នាក់ៗ វាបង្កើនទំនុកចិត្ត និង បន្ថែមថាមពលដល់ពួកគេ។ មិនថាសម្រាប់កម្មវិធីពិសេសឬការថតរូប ការឃើញភ្ញៀវមានអារម្មណ៍ស្រស់ស្អាត មានឥទ្ធិពល និង ត្រៀមខ្លួនរួចជាស្រេចក្នុងការបង្ហាញសម្រស់ វាគឺជារង្វាន់ដ៏អស្ចារ្យសម្រាប់លោក៕
