នៅយប់ថ្ងៃទី ១៨ ខែសីហា ឆ្នាំ ២០២៥ មានករណីប្លន់យកម៉ូតូមួយគ្រឿងបានសម្រេច បន្ទាប់ពីជនរងគ្រោះដែលជាប្ដីប្រពន្ធ កំពុងឈប់ទិញមីឆា ស្ថិតនៅតាមបណ្ដោយផ្លូវជាតិលេខ៣ ភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ។
ទាក់ទិនទៅនឹងករណីនេះ តាមប្រភពព័ត៌មានបានឱ្យដឹងថា នៅយប់ថ្ងៃកើតហេតុ វេលាម៉ោង ១០:៥០ នាទីយប់ ថ្ងៃទី ១៨ ខែសីហាឆ្នាំ ២០២៥ មានជនសង្ស័យមួយក្រុមជិះម៉ូតូ ២ គ្រឿង បានធ្វើកម្មភាពយកដាវ បម្រុងកាប់ទៅលើប្ដីប្រពន្ធពីរនាក់ ខណៈក្នុងនោះជនរងគ្រោះជាប្រពន្ធកំពុងមានផ្ទៃពោះ ២ ខែទៀត ពេលកំពុងឈប់ទិញមីឆា ដែលពេលនោះជនបង្កបានប្លន់យកម៉ូតូ ឌ្រីមសង់មួយគ្រឿងបានសម្រេច រួចជិះគេចខ្លួនបាត់ស្រមោល។
ម៉ូតូជនរងគ្រោះដែលជនសង្ស័យប្លន់យកទៅបាត់ គឺម៉ាកឌ្រីមសង់ពណ៌ខ្មៅ ស៊េរីឆ្នាំ ២០២៥ ពាក់ស្លាកលេខភ្នំពេញ 1LF-5803 ខណៈបើតាមការរៀបរាប់ស្ត្រីជាប្រពន្ធបានឱ្យដឹងថា ខ្លួនមានផ្ទៃពោះ ២ ខែ ហើយពួកគេទាំង ២ នាក់ ធ្វើការរោងចក្រ បានម៉ូតូមួយហ្នឹងហើយ គ្រាន់ជាមធ្យោបាយធ្វើដំណើរ ហើយបង់រំលស់គេទើបតែបាន ៧ ខែ ពេលនេះត្រូវបាត់បង់ទៀត។ យ៉ាងណាមិញ ក្រោយកើតហេតុ ជនរងគ្រោះបានដាក់ពាក្យបណ្ដឹងនៅប៉ុស្ត៍នគរបាលរដ្ឋបាលក្រាំងពង្រ ដើម្បីឱ្យសមត្ថកិច្ចជួយអន្តរាគមន៍៕
