ថ្មីៗនេះ មហាជនអ្នកប្រើប្រាស់បណ្ដាញសង្គមហ្វេសប៊ុក បាន និង កំពុងសម្ដែងក្ដីសោកសង្រេងចំពោះករណីក្មេងស្រីម្នាក់អាយុប្រមាណជិត ១០ ឆ្នាំ បន្ទាប់នាងតូចបានបាត់បង់ជីវិតនៅមន្ទីរពេទ្យមួយកន្លែង ដោយសារក្ដៅខ្លួនខ្លាំង។
តាមរយៈគណនីហ្វេសប៊ុកឈ្មោះ Eii Leak ដែលអះអាងថាជាម្ដាយមីង បានបង្ហោះសារទាំងសោកសង្រេងពីករណីនេះ កាលពីថ្ងៃទី ២៥ ខែកុម្ភៈ ឆ្នាំ ២០២៥ កន្លងទៅ ភ្ជាប់ជាមួយរូបភាពឱ្យដឹងថា ៖ «ឈឺចាប់ណាស់ កូនកំពុងតែពេញស្រឡាញ់ ក្មួយឃើញម៉ាក់ក្មួយយំខ្លាំងអត់ ម៉េចក៏ឆក់យកជីវិតក្មួយខ្ញុំទៅអ៊ីចឹង គ្នានៅតូចណាស់ រចនា សូមក្មួយទៅឱ្យបានសុខណាក្មួយណា មានជាតិក្រោយសូមឱ្យក្មួយអាយុវែងណាក្មួយណា»។
ភ្ជាប់នឹងការបង្ហោះនោះទៀតសោត គណនីហ្វេសប៊ុកឈ្មោះ Eii Leak បានបញ្ជាក់ពីមូលហេតុនៃការបាត់បង់ជីវិតរបស់ក្មួយស្រីជាទីស្រឡាញ់របស់ខ្លួនថែមទៀតថា ៖ «ខ្ញុំអត់មានពេលតបខំមិនទេបងប្អូន អ៊ីចឹងខ្ញុំបញ្ជាក់ប្រាប់នៅក្នុងខំមិនហ្នឹងតែម្តង ក្មួយខ្ញុំស្លាប់ដោយសារមូលហេតុក្មួយខ្ញុំក្ដៅខ្លួន ហើយយកទៅពេទ្យ ពេទ្យដាក់សេរ៉ូមចាក់ថ្នាំឱ្យខុសបណ្ដាលឱ្យក្មួយខ្ញុំស្លាប់ភ្លាមៗបងបង ហើយក៏អរគុណបងៗដែលឆាតមកជួយរំលែកទុកក្មួយស្រីខ្ញុំ និង ខំមិនជួយរំលែកទុក្ខច្រើន ខ្ញុំអរគុណបងប្អូន»។
បន្ថែមលើសពីនេះ នៅថ្ងៃទី ២៧ ខែកុម្ភៈ ឆ្នាំ ២០២៥ នេះ តាមប្រភពដដែលបានបង្ហោះសារបញ្ជាក់ឱ្យដឹងទៀតថា ៖ «រឿងហ្នឹងផ្ទុះខ្លាំងណាស់ សង្ឃឹមថាក្មួយនឹងមានយុតិធម៌ចំពោះក្មួយណា រចនា និង អរគុណដល់បងៗសារព័ត៌មានដែលខលមកសួរនាំរឿងក្មួយខ្ញុំស្លាប់ និង បងៗឆាតមកជួយរំលែកទុក្ខយ៉ាងច្រើន ខ្ញុំមានតែពាក្យថាអរគុណដល់បងៗគ្រប់គ្នា ហើយរឿងដែលនាងខ្ញុំមិនទាន់បានប្រាប់ថាក្មួយខ្ញុំស្លាប់នៅពេទ្យណា អ៊ីចឹងគេចាំរួចរាល់បុណ្យសពសិនបងៗ បានខ្ញុំហ៊ានបញ្ជេញឈ្មោះពេទ្យ»៕
