កាលពីថ្ងៃទី ៦ ខែកញ្ញា ឆ្នាំ ២០២៥ កន្លងទៅនេះ អាជ្ញាធរពាក់ព័ន្ធក្នុងប្រទេសថៃ បានចុះទៅត្រួតពិនិត្យកន្លែងស្តុកសាច់ចំនួន ៣ នៅខេត្តអយុធ្យា ហើយរឹបអូសបានសាច់គោ និងសាច់ក្របីខុសច្បាប់ជាង ១៩០ តោន សរុបជាទឹកប្រាក់ជាង ១៥ លានបាត។
តាមព័ត៌មានបានឱ្យដឹងថា មន្ត្រីមកពីនាយកដ្ឋាននគរបាលការពារអ្នកប្រើប្រាស់ (CPPD) និងនាយកដ្ឋានអភិវឌ្ឍន៍បសុសត្វរបស់ថៃ បានសហការគ្នាចុះទៅត្រួតពិនិត្យកន្លែងស្តុកសាច់គួរឱ្យសង្ស័យចំនួន ៣ កន្លែងនៅក្នុងខេត្តអយុធ្យា ប្រទេសថៃ។ ក្នុងនោះ គេបានរកឃើញថាសាច់ទាំងអស់ភាគច្រើនគ្មានបញ្ជាក់ពីប្រភពនាំចូលច្បាស់លាស់ឡើយ ដែលបង្កជាហានិភ័យដល់សុខភាពអ្នកបរិភោគ និងប៉ះពាល់ដល់សេដ្ឋកិច្ចជាតិ។
ដោយឡែក ដូច្នេះហើយទើបអាជ្ញាធរបានធ្វើការរឹបអូសយកសាច់គោ ៣ ៥៥០ គីឡូក្រាម សាច់ក្របីចំនួន ១៤០គីឡូក្រាម គ្រឿងក្នុងគោចំនួន ១៨៦ ៧៨៨ គីឡូក្រាម ទម្ងន់សរុបទាំងអស់ជាង ១៩០ តោន និងមានតម្លៃសរុបចំនួន ១៥ លានបាត។ អាជ្ញាធរបានទុកពេល ១៥ ថ្ងៃ ឱ្យម្ចាស់អាជីវកម្មផ្តល់ភ័ស្តុតាងបញ្ជាក់ពីប្រភពនាំចូល បើសិនជាធ្វើមិនបានទេ នោះនឹងត្រូវដំណើរការក្តីទៅតាមផ្លូវច្បាប់៕
ប្រភព៖ Khaosod
