មកទល់ពេលនេះ អាជ្ញាធរនៅក្នុងប្រទេសថៃ នៅតែដុតដៃដុតជើងព្យាយាមសង្រ្គោះជនរងគ្រោះ ដែលកំពុងជាប់នៅក្នុងគំនរអគារ ៣០ ជាន់នាទីក្រុងបាងកក ដែលបានស្រុតរលំបណ្តាលមកពីគ្រោះរញ្ជួយដី កាលពីថ្ងៃទី ២៨ ខែមីនា ឆ្នាំ ២០២៥ កន្លងទៅ។
យ៉ាងណាមិញ នៅថ្ងៃទី ១ ខែមេសា ឆ្នាំ ២០២៥ នេះ លោក Bind Banleurit ដែលជាអ្នកជួយសង្រ្គោះដ៏ល្បីមួយរូបរបស់ថៃ បានទម្លាយឱ្យដឹងថា ការជួយសង្រ្គោះមិនយឺតយ៉ាវនោះទេ ប៉ុន្តែមានឧបសគ្គច្រើនណាស់។ ឥឡូវខាងអាជ្ញាធរបានប្រើគ្រឿងបច្ចេកវិទ្យា Scan មើលទៅលើកន្លែងកើតហេតុ ហើយបានឃើញថានៅមានមនុស្សប្រហែល ៧០ នាក់ ដែលនៅជាប់នៅក្នុងនោះ តែមិនដឹងថានៅរស់ ឬស្លាប់ ដោយភាគច្រើនពួកគេផ្តុំគ្នានៅកណ្តាលអគាររវាងជាន់ទី ១៧ និង ជាន់ទី ២១។
ក្នុងនោះការជួយសង្រ្គោះនេះ ការប្រើឧបករណ៍ប្រភេទស្រាលមិនអាចជួយបានទេ មានតែការប្រើឧបករណ៍ធុនធ្ងន់។ ក្នុងនោះ គេនឹងព្យាយាមយកកម្ទេចសំណង់ចេញពីខាងលើទៅដោយថ្នមៗ ហើយបើសិនជាឃើញសាកសព អាជ្ញាធរនឹងយកចេញ រួចនឹងបញ្ជូនទៅពិនិត្យកោសល្យវិច្ច័យដើម្បីផ្ទៀងផ្ទាត់អត្តសញ្ញាណជាមួយសាច់ញាតិ៕
ប្រភព៖ AMARINTV
