នៅព្រឹកថ្ងៃទី ១៣ ខែតុលា ឆ្នាំ ២០២៥ នេះ ក្រសួងមហាផ្ទៃ បានជូនដំណឹងស្តីពីការប្រឡងប្រជែងជ្រើសរើសក្របខ័ណ្ឌមន្ត្រីនគរបាលជាតិ សម្រាប់ឆ្នាំ ២០២៥ ឱ្យចូលបម្រើការងារនៅតាមស្នងការដ្ឋាននគរបាលរាជធានី-ខេត្ត។
តាមរយៈការជ្រើសរើសនៅតាមបណ្ដារាជធានីខេត្តនីមួយៗនេះ ក្រសួងមហាផ្ទៃ បានបញ្ជាក់ពីលក្ខខណ្ឌនៃការជ្រើសរើស ៨ យ៉ាងរួមមាន ៖
១. បេក្ខជនទាំងពីរភេទ ត្រូវមានសញ្ជាតិខ្មែរ
២. មានទីលំនៅអចិន្ត្រៃយ៍នៅភូមិសាស្ត្រឃុំសង្កាត់ដែលមានការជ្រើសរើស និង ឃុំសង្កាត់ជាប់ព្រំប្រទល់
៣. មានជីវប្រវត្តិច្បាស់លាស់ មានកិរិយាមារយាទល្អ និង ពុំធ្លាប់មានពិរុទ្ធភាពកន្លងមក
៤. មានកាយសម្បទាគ្រប់គ្រាន់ និង មានសុខភាពល្អ (ឆ្លងកាត់ការត្រួតពិនិត្យភ្នែក ត្រចៀក ច្រមុះ មាត់ បេះដូង ថ្លើម សួត ជំងឺរបេង អេដស៍ ក្រុមឈាម និង តេស្តរកសារធាតុញៀន)
៥. មិនមានស្លាកស្នាមរបួស ឬ ស្លាកស្នាមសាក់
៦. បុរសមានកម្ពស់ ១,៧០ ម៉ែត្រឡើង នារីមានកម្ពស់ ១,៦៥ ម៉ែត្រឡើង និង មានទម្ងន់សមាមាត្រនឹងកម្ពស់
៧. មានសញ្ញាបត្រមធ្យមសិក្សាទុតិយភូមិ ឬ សញ្ញាបត្រដែលមានតម្លៃស្មើ និង មានអាយុពី ១៨ ឆ្នាំ ដល់ ២៥ ឆ្នាំ គិតត្រឹមថ្ងៃប្រឡង
៨. មានសញ្ញាបត្របរិញ្ញាបត្រ ឬ សញ្ញាបត្រដែលមានតម្លៃស្មើឡើង និង មានអាយុយ៉ាងច្រើនត្រឹម ៣០ ឆ្នាំ គិតត្រឹមថ្ងៃប្រឡង។
យ៉ាងណាមិញ ចំពោះការប្រឡងប្រជែងជ្រើសរើសក្របខ័ណ្ឌមន្ត្រីនគរបាលជាតិ សម្រាប់ឆ្នាំ ២០២៥ នេះ មានផ្តល់ពាក្យចាប់ពីថ្ងៃទី ២០ ដល់ថ្ងៃទី ២៤ ខែតុលា ឆ្នាំ ២០២៥ និង ទទួលពាក្យ ចាប់ពីថ្ងៃទី ២៧ ដល់ថ្ងៃទី ៣១ ខែតុលា ឆ្នាំ ២០២៥ នៅតាមស្នងការដ្ឋាននគរបាលរាជធានី-ខេត្តដែលបានជ្រើសរើស៕
