កាលពីថ្ងៃទី ២៥ ខែកញ្ញា ឆ្នាំ ២០២៥ កន្លងទៅនេះ លោក Suriyachai Rawiwan ប្រធានការិយាល័យបង្ការ និងកាត់បន្ថយគ្រោះមហន្តរាយ នៃរដ្ឋបាលក្រុងបាងកក បានទម្លាយផែនការដំណោះស្រាយចំពោះការបាក់ស្រុតដីជម្រៅ ៥០ ម៉ែត្រនៅមុខមន្ទីរពេទ្យវិជ្ជរ៉ា នាទីក្រុងបាងកក។
លោក Suriyachai បានឱ្យដឹងថា ក្នុងដំណាក់កាលដំបូងគេនឹងប្រើស៊ីម៉ង់ចំនួន ៥០០ ម៉ែត្រគូប មកចាក់បិតមាត់ផ្លូវរូងក្រោមដី ដើម្បីការពារការបាក់ស្រុតដីបន្ថែម ដោយប្រើរយៈពេល ២៤ ម៉ោង។ ដំណាក់កាលទីពីរ គេនឹងយកដីចំនួន ៧០០០ ម៉ែត្រគូបមកចាក់បំពេញរណ្តៅ ដោយចាក់ក្នុងមួយថ្ងៃ ២០០០ ម៉ែត្រគូប ហើយប្រើពេលប្រមាណ ៣ ទៅ ៤ ថ្ងៃ។
លោក Suriyachai បានបន្តទៀតថា ក្តីបារម្ភចម្បងនោះ គឺខ្លាចមានភ្លៀងធ្លាក់ បើសិនជាភ្លៀងធ្លាក់មកមែននោះ វានឹងអាចប៉ះពាល់ដល់ដំណោះស្រាយខាងលើនេះ ហើយក៏ប៉ះពាល់ដល់សុវត្ថិភាពអ្នកធ្វើការផងដែរ។ ដោយឡែក អាជ្ញាធរពាក់ព័ន្ធកំពុងតែបន្តការត្រួតពិនិត្យនៅជុំវិញអគារ ហើយក៏កំពុងពន្លឿនការជួសជុលស្របតាមផែនការផងដែរ៕
ប្រភព៖ Khaosod
