ដូចបានដឹងស្រាប់ BVLGARI ជាម៉ាកប្រណីតល្បីលំដាប់ពិភពលោក រាល់ការជ្រើសរើសអ្វីមួយមកបង្ហាញជាមួយផលិតផល រមែងតម្រូវមានលក្ខណៈប្រណីត ខ្ពង់ខ្ពស់ និង មានតម្លៃបំផុត។ ជាក់ស្តែង អមនឹងការតាំងបង្ហាញខូឡិកហ្សិនគ្រឿងអលង្ការនៅក្នុងកម្មវិធី BVLGARI AETERNA ដែលធ្វើឡើងនៅខេត្តសៀមរាប ម៉ាកយីហោដ៏ល្បីនេះ បានជ្រើសរើសសិប្បកម្មចម្លាក់មួយកន្លែង ដើម្បីធ្វើចម្លាក់ថ្មក្បាច់ខ្មែរ ដាក់តាំងអមនឹងគ្រឿងអលង្ការតម្លៃរាប់សែន រាប់លានដុល្លារ។
កន្លែងសិប្បកម្មដែលម៉ាក BVLGARI បានជ្រើសរើសមានឈ្មោះថា Artisans Angkor ឬ សិប្បករអង្គរ មានទីតាំងស្ថិតនៅក្នុងខេត្តសៀមរាបផ្ទាល់តែម្តង។ តាមការបង្ហោះនៅលើទំព័រហ្វេសប៊ុករបស់ Artisans Angkor បានសរសេររៀបរាប់ថា៖ «ក្បាច់រចនាបុរាណខ្មែរ ស័ក្តិសមនឹងភាពប្រណីតឥតខ្ចោះរបស់គ្រឿងអលង្ការលំដាប់ពិភពលោក។ នៅក្នុងកម្មវិធីរាត្រីសមោសរ និង តាំងបង្ហាញគ្រឿងអលង្ការប្រណីតនៅខេត្តសៀមរាប ក្រុមហ៊ុន BVLGARI បានចូលរួមលើកតម្កើងកេរដំណែលវប្បធម៌ និង សិល្បៈខ្មែរ ដោយជ្រើសយកស្នាដៃចម្លាក់ថ្មរបស់ក្រុមហ៊ុនសិប្បករអង្គរ។ នេះគឺជាសក្ខីភាពស្តែងឱ្យឃើញយ៉ាងជាក់ច្បាស់ថា សម្រស់ស្នាដៃវប្បធម៌ និង សិល្បៈខ្មែរក៏មានភាពប្រណីតឆើតឆាយ ស័ក្តិសមនៅក្នុងគ្រប់ទម្រង់ និង សម័យកាលដែរ។
សិប្បករអង្គរ គឺជាកន្លែងដែលកេរដំណែលវប្បធម៌ និង សិល្បៈខ្មែរ ផ្សារភ្ជាប់នឹងភាពច្នៃប្រតិដ្ឋ ភាពប្រណីត និង ភាពទាន់សម័យ។ យើងផលិតពីវត្ថុធាតុដើមដូចគ្នា ដោយដៃខ្មែរដូចគ្នា ប្រើសម្ភារដូចគ្នា ដូចកាលពី ១០០០ ឆ្នាំមុន»៕
