លោក ខ្វៃ សំណាង គឺជាសិល្បករពហុជំនាញដ៏ល្បីល្បាញមួយរូបនៅកម្ពុជា។ មិនតែប៉ុណ្ណោះ លោកបានបង្កើតស្នាដៃអស្ចារ្យជាច្រើន យកទៅបង្ហាញនៅក្រៅប្រទេស ធ្វើឱ្យអន្តរជាតិចាប់អារម្មណ៍ និង ស្ងើចសរសើរជាខ្លាំង។ មានស្រុកកំណើតនៅខេត្តស្វាយរៀង និង បញ្ចប់បរិញ្ញាបត្រពីសាកលវិទ្យាល័យភូមិន្ទវិចិត្រសិល្បៈក្នុងឆ្នាំ ២០០៦ សព្វថ្ងៃការងារសិល្បៈរបស់លោក សុទ្ធតែកើតចេញពីភាពច្នៃប្រឌិត និង យុត្តិធម៌សង្គម។
ជាមួយសមត្ថភាពពហុជំនាញ លោកអាចបង្កើតស្នាដៃសិល្បៈតាមរយៈការថតរូប ថតវីដេអូ ចម្លាក់ ដំឡើងសិល្បៈ និង ការសម្តែង…ជាដើម។ ការអនុវត្តសិល្បៈរបស់លោក លោកតែងចំណាយពេលវេលាយ៉ាងច្រើន ចូលរួមដោយផ្ទាល់ជាមួយសហគន៍ក្នុងស្រុក ក្នុងការខិតខំប្រឹងប្រែងដើម្បីស្រាវជ្រាវ និង ទទួលបានការយល់ដឹងស៊ីជម្រៅពីបញ្ហាសង្គម ដែលកំពុងប្រឈមនាពេលបច្ចុប្បន្ននៅកម្ពុជា។
ខណៈស្វែងរកទស្សនៈ និង ការបកស្រាយថ្មីៗនៃប្រវត្តិសាស្ត្រ បូករួមទាំងជំនឿ និង ទំនៀមទម្លាប់ប្រពៃណីផងនោះ លោកបង្កើតសិល្បៈដោយប្រើប្រាស់កាយវិការ ឬនិមិត្តសញ្ញា ដើម្បីបង្ហាញអត្ថន័យច្រើនស្រទាប់តាមរយៈមធ្យោបាយផ្សេងៗ រួមទាំងសិល្បៈចម្លាក់ ដែលដាក់បញ្ចូលនូវវត្ថុធាតុធម្មជាតិ ការដំឡើងសិល្បៈ វីដេអូសិល្បៈ និង ការសម្តែងដោយប្រើខ្លួនលោក និង អ្នករាំ។
រយៈពេលច្រើនឆ្នាំកន្លងមក សកម្មភាពបង្ហាញស្នាដៃរបស់លោក មានការទទួលស្គាល់ជាអន្តរជាតិ។ លោកបានធ្វើការតាំងពិព័រណ៍ស្នាដៃទោលនៅទីតាំងច្រើនកន្លែងរួមមាន៖ មជ្ឈមណ្ឌលសិល្បៈ the Jeu de Paume ទីក្រុងប៉ារីស ប្រទេសបារាំង ឆ្នាំ ២០១៥, មជ្ឈមណ្ឌលសិល្បៈ CAPC Musée d’art contemporain de Bordeaux នៅបារាំង ឆ្នាំ ២០១៥, សារមន្ទីរ Haus der Kunst ទីក្រុង Munich ប្រទេសអាល្លឺម៉ង់ ឆ្នាំ ២០១៨, កន្លែងសិល្បៈ Tramway ទីក្រុង Glasgow ប្រទេសស្កុតឡេនឆ្នាំ ២០២១, សារមន្ទីរ ifa Gallery ទីក្រុង Stuttgart ប្រទេសអាល្លឺម៉ង់ ឆ្នាំ ២០២២, វិចិត្រសាល Tomio Koyama Gallery Tennoz ប្រទេសជប៉ុន ឆ្នាំ ២០២៤។
លើសពីនេះ លោកបានចូលរួមការតាំងពិព័រណ៍ជាក្រុម លក្ខណៈអន្តរជាតិច្រើនដងរាប់មិនអស់។ ក្នុងនោះបូករួមការតាំងពិព័រណ៍សិល្បៈអន្តរជាតិ Documenta ឆ្នាំ ២០១៧ និង Document ឆ្នាំ ២០២២ (ក្នុងនាមជាសមាជិកនៃគម្រោង Sa Sa Art Projects) នៅទីក្រុង Kassel អាល្លឺម៉ង់ និង កម្មវិធីតាំងពិព័រណ៍សិល្បៈអន្តរជាតិដ៏ធំ La Biennale de Venezia លើកទី ៦០ នៅអ៊ីតាលី ឆ្នាំ ២០២៤ ផងដែរ៕
