នៅថ្ងៃទី ១ ខែកញ្ញា ឆ្នាំ ២០២៥ នេះ សារព័ត៌មាន Khaosod បានរាយការណ៍ពីករណីចលាចលជាថ្មីនៅក្នុងខេត្តណារ៉ាធីវ៉ាត ប្រទេសថៃ ដែលក្រុមជនដៃដល់បាននាំគ្នាសម្រុកអុកឡុកយ៉ាងខ្លាំង។
តាមព័ត៌មានបានឱ្យដឹងថា កាលពីថ្ងៃទី ៣១ ខែសីហា ឆ្នាំ ២០២៥ កន្លងទៅនេះ ចាប់ពីម៉ោងប្រហែល ៧ និង ៤០ នាទីយប់ទៅ ក្រុមជនដៃដល់បាននាំគ្នាចេញមកអុកឡុកពេញមួយទំហឹង ដោយបានលួចដាក់គ្រាប់បែកផង លួចដុតកងរថយន្តផង និង បំផ្ទុះទូ ATM ទៀត នៅតាមកន្លែងផ្សេងៗគ្នានៅក្នុងខេត្តណារ៉ាធីវ៉ាត ជាប់ព្រំដែនម៉ាឡេស៊ី រួមមានស្រុកស៊ូង៉ៃប៉ាធី ស្រុកចាណែស និងស្រុកបាចោះ ដែលបង្កឱ្យមានការភ័យខ្លាច និង ជ្រួលច្របល់ជាខ្លាំង។
យ៉ាងណាមិញ តាមព័ត៌មានបានឱ្យដឹងទៀតថា គ្មានជនណាម្នាក់បានរងរបួសនៅក្នុងហេតុការណ៍នេះឡើយ ហើយខាងអាជ្ញាធរកំពុងតែចុះទៅត្រួតពិនិត្យនៅនឹងកន្លែង ព្រមទាំងស្រាវជ្រាវរកមុខជនបង្កផងដែរ៕
ប្រភព៖ Khaosod
