ស្របពេលកម្ពុជាកំពុងរងការឈ្លានពានវាយប្រហាពីថៃនៅតាមព្រំដែន ពេលនេះមហាជនកម្ពុជា រួមទាំងអ្នកសិល្បៈ ក៏ដូចជាអ្នកជំនួញជាច្រើន កំពុងពួតដៃគ្នាចូលរួមចែករំលែកបង្ហាញការបួងសួង ព្រមទាំងមានការចូលរួមជួយជាថវិកា សម្ភារផ្សេងៗជូនបងប្អូនកងទ័ពជួរមុខ និង បងប្អូនគ្រួសារដែលបានជម្លៀសខ្លួនពីព្រំដែនមកកាន់ទីទួលសុវត្ថិភាពជាបន្តបន្ទាប់។
ក្នុងនោះដែរ គេក៏បានឃើញអ្នកផលិតមាតិកាធ្វើម្ហូបមួយចំនួនក៏បានត្រៀមរៀបចំធ្វើម្ហូប ដើម្បីជូនកងទ័ពជួរមុខតាមព្រំដែន និង សម្រាប់បងប្អូនដែលបានជម្លៀសទៅតំបន់សុវត្ថិភាពផ្សេងៗផងដែរ។
ជាក់ស្តែង កាលពីព្រឹកថ្ងៃទី ២៥ ខែកក្កដា ឆ្នាំ ២០២៥ គេបានឃើញអ្នកផលិតមាតាធ្វើម្ហូបខាងខេត្តបន្ទាយមានជ័យ គឺកញ្ញា ស្រីផាច ក៏បាន និង កំពុងរៀបរៀបចំធ្វើម្ហូបដែលអាចទុកបានយូរ សម្រាប់ជាអាហារជូនកងទ័ពជួរមុខតាមព្រំដែន និង សម្រាប់បងប្អូនដែលបានជម្លៀសដែរ។ ដោយឡែក នៅរសៀលថ្ងៃដដែលនោះ ក្រឡេកទៅមើលអ្នកផលិតមាតិកាធ្វើម្ហូបនៅខាងខេត្តបាត់ដំបង គឺអ្នកនាង ឃុន គឹមហៃ ក៏បាន និង កំពុងរៀបចំអាហារ និង មីអំបុកដើម្បីទុកជូនបងប្អូនកងទ័ពដែរ។
ក្នុងនោះ អ្នកផលិតមាតិកាវីដេអូធ្វើម្ហូប ឃុន គឹមហៃ បានបង្ហោះរៀបរាប់លើហ្វេសប៊ុកថា ៖ «ខ្ញុំនឹងក្រុមការងារអាហារដ្ឋានឃុន កំពុងត្រៀមកាពិផាវ ៥០០ ដប និង មីអំបុក ជាង ១០០០ កញ្ចប់ ជូនបងៗវីរកងទ័ពជួរមុខ»៕
