មកទល់ពេលនេះ រយៈពេលជាងកន្លះឆ្នាំមកហើយ ដែលពិធីការិនីល្បីឈ្មោះ ម៉េង ជីមមី និង ស្វាមី នូ ជីមមី បានដឹកដៃគ្នារៀបការតាមប្រពៃណីខ្មែរជាលក្ខណៈគ្រួសារនៅថ្ងៃទី ១៨ ខែកក្កដា ឆ្នាំ ២០២៤ កន្លងទៅ ក្រោយពីរួមរស់មានឈ្មោះជាប្ដីប្រពន្ធពេញច្បាប់ ដោយចុះអ៊ីតាស៊ីវិលតាំងពីឆ្នាំ ២០២៣។
ក្រោយរៀបចំពិធីអាពាហ៍ពិពាហ៍តាមប្រពៃណីក្លាយជាស្វាមីភរិយាពេញមុខ មានបងប្អូនសាច់ញាតិដឹងឮ ប៉ុន្មានខែមកនេះ ឃើញថាពិធីការិនីរូបនេះ និង ស្វាមី ក៏បានចាប់ដៃគ្នាធ្វើការរកស៊ីពង្រីកមុខជំនួញលើវិស័យអនឡាញកាន់តែកាក់កប ហើយក៏មិនទាន់ឃើញគិតគូររឿងយកទាយាទស្នងត្រកូលនៅឡើយ។
ដោយឡែក អ្វីកាន់តែចាប់អារម្មណ៍ចំពោះប្ដីប្រពន្ធមួយគូនេះទៀតនោះ ខណៈថ្មីៗនេះ អ្នកនាង ម៉េង ជីមមី និង ស្វាមី បានដឹកដៃគ្នាហោះទៅទីក្រុងឌូបៃប្រទេសអារ៉ាប់រួម ដែលជាដំណើរកម្សាន្តក្រេបទឹកឃ្មុំ ក្រោយពីរៀបការជាមួយគ្នាជាងកន្លះឆ្នាំ។
ដំណើរក្រេបទឹកឃ្មុំនេះដែរ អ្នកនាង ជីមមី និង ស្វាមី កំពុងចាយជីវិតយ៉ាងអភិជនលើទឹកដីទីក្រុងឌូបៃ ដែលបានបង្ហាញសកម្មភាពទៅលេងកន្លែងស្អាតៗ ល្បីៗតម្លៃរាប់ម៉ឺនដុល្លារ ដោយបានផ្ដិតយករូបភាពជាមួយគ្នាពេញដោយភាពផ្អែមល្ហែម និង ក្ដីសុខខ្លាំង៕
