អបអរ! ស៊ុក សុភា ប្រកាសដំណឹងល្អ ភរិយាកំពុងពពោះកូនក្នុងផ្ទៃម្នាក់ទៀត ជាទាយាទទី ៦

គិតមកដល់ពេលនេះ រយៈពេលជាង ១៣ ឆ្នាំហើយ ដែលអតីតតារាសម្ដែងល្បីឈ្មោះលោក ស៊ុក សុភា បានរៀបការសាងគ្រួសាររស់នៅលើទឹកដីប្រទេសអូស្ដ្រាលី ដែលទទួលបានចំណងដៃកូនប្រុសស្រីដ៏គួរឱ្យស្រឡាញ់ចំនួន ៥ នាក់ហើយ។

ទាក់ទងនឹងជីវិតគ្រួសារ អតីតតារាសម្ដែងប្រុសរូបនេះ តែងតែឃើញបង្ហាញសកម្មភាពនៃការរស់នៅក្រៅប្រទេសលើបណ្ដាញសង្គមជាហូរហែ ដែលស្ដែងពីជីវិតគ្រួសារដ៏មានសុភមង្គលជាមួយភរិយា និង កូនប្រុសស្រីទាំង ៥ រូប ដែលសព្វថ្ងៃលោក និង ភរិយា បានបង្កើតការរកស៊ីកាក់កបរស់នៅពេញដោយភាពហាយសូរផងដែរ។

បើក្រឡេកទៅមើលកូនៗរបស់លោក ស៊ុក សុភា ទាំង ៥ រូប ពេលនេះដែរក៏កាន់តែធំៗពេញរូបពេញរាងអស់ហើយ ដែលពួកគេសុទ្ធសឹងតែមានរូបរាងស្រស់ស្អាតស្រស់សង្ហា ឆ្លាតៗគួរឱ្យស្រឡាញ់ទាំងប្រុសទាំងស្រី។

ស្របពេលទទួលបានជីវិតគ្រួសារពេញដោយក្ដីសុខ និង ភាពកក់ក្ដៅនេះដែរ ថ្មីៗនេះ ស៊ុក សុភា ក៏បានប្រកាសដំណឹងល្អក្នុងគ្រួសារបន្ថែមទៀត ដែលពេលនេះ ភរិយារបស់លោក កំពុងពពោះកូនក្នុងផ្ទៃម្នាក់ទៀតហើយ គឺជាទាយាទទី ៦ នៃគ្រួសារផងដែរ។

នេះបើតាមរយៈហ្វេសប៊ុករបស់លោក ស៊ុក សុភា បានបង្ហោះរៀបរាប់ថា ៖ «ខ្ញុំបាទ ស៊ុក សុភា សូមប្រកាសឱ្យពិភពលោកបានដឹងថា កាដូឆ្នាំថ្មី 2025 នេះពួកខ្ញុំទទួលបាន សមាជិក 1 នាក់ទៀតហើយ»៕