ពិតណាស់ ប៉ុន្មានថ្ងៃកន្លងទៅនេះ មហាជនអ្នកគាំទ្រវិស័យបវរកញ្ញា ជាពិសេសសិល្បករកម្ពុជាជាច្រើនរូប បានខ្នះខ្នែងខ្លាំងទាក់ទងនឹងដំណើរការបោះឆ្នោតឱ្យ ប្រាសាទ ដាវីន ខណៈកម្មវិធី Miss Universe មានការបើកឱ្យបោះឆ្នោតគាំទ្រចំពោះបេក្ខភាពបវរកញ្ញាតំណាងប្រទេសនីមួយៗ ដើម្បីឈ្នះពានរង្វាន់ Top 10 Voice For Change ដែលអាចទទួលបានជ័យលាភីពានមាស និង ប្រាក់ ក្នុងចំណោមប្រទេសទាំង ១០ នៃការប្រកួត Voice For Change នេះ។
មកដល់រសៀលថ្ងៃទី ១២ ខែវិច្ឆិកា ឆ្នាំ ២០២៤ នេះ ការដាក់ឱ្យបោះឆ្នោតសម្រាប់កម្មវិធី Voice For Change ក៏បានបិទបញ្ចប់ហើយ ព្រមទាំងកម្មវិធីក៏បានប្រកាសពីបវរកញ្ញាតំណាងប្រទេសដែលជាប់ Top 3 នៃការបោះឆ្នោតនេះ ដែលមហាជនអ្នកគាំទ្រកម្ពុជាកំពុងតែបង្ហាញការអបអរចំពោះបវរកញ្ញាកម្ពុជាយើង អ្នកនាង ប្រាសាទ ដាវីន គឺបានជាប់ Top 2 នៃកម្មវិធី Voice For Change និង ទទួលបានពានរង្វាន់មាសពីវិធីផងដែរ។
តាមរយៈការបង្ហោះលើហ្វេសប៊ុកផេកគាំទ្របវរកញ្ញាផ្សេងៗ បានឱ្យដឹងថាសម្រាប់ប្រទេសទាំង ៣ ដែលទទួលការបោះឆ្នោតច្រើនបំផុត គឺត្រូវបានជ្រើសរើសដោយស្វ័យប្រវត្តិទៅកាន់ Top 10 នៃការប្រកួត Voice For Change ព្រមទាំង ៧ ប្រទេសផ្សេងទៀត នឹងត្រូវជ្រើសរើសដោយគណៈកម្មការ៕
