អនុស្សាវរីយ៍ វប្បធម៌ និង ប្រវត្តិសាស្ត្ររបស់កម្ពុជា ត្រូវបានបុរសម្នាក់រម្លឹកឡើងវិញ តាមរយៈពិព័រណ៍ «តែមប្រៃសណីយ៍ និង តែមប្រៃសណីយ៍កម្ពុជាវគ្គ ២»

ត្រឹមបំណែកក្រដាសតូចមួយ តែមប្រៃសណីយ៍អាចទាញការចងចាំ រម្លឹកឡើងវិញនូវវប្បធម៌ ប្រវត្តិសាស្ត្រ និង ការវិវត្តនៃទំនាក់ទំនងសកល។ ដើម្បីបង្ហាញរឿងរ៉ាវទាំងនេះនៃកម្ពុជា លោក Fat Jase ដែលអ្នកជាប្រមូលតែមប្រមាណជាង ១០ ឆ្នាំ បានរៀបចំពិព័រណ៍តែមប្រៃសណីយ៍មួយ ក្រោមប្រធានបទ «POSTAGE STAMPS, FEATURING CAMBODIA – PART 2» ឬ «តែមប្រៃសណីយ៍ និង តែមប្រៃសណីយ៍កម្ពុជា – វគ្គ ២»។

កម្មវិធីពិព័រណ៍ខាងលើ បានអញ្ជើញភ្ញៀវចូលរួមយ៉ាងច្រើនកុះករ សុទ្ធសឹងជាភ្ញៀវ VIP ទាំងខ្មែរ និង បរទេស ដែលធ្វើឡើងកាលពីថ្ងៃទី 0៣ ខែ មេសា ឆ្នាំ ២០២៥ នៅឯវិចិត្រសាល Synopsis Gallery និង ស្ទូឌីយ៉ូ STOR-Y Cambodia ស្ថិតនៅផ្លូវ B19 & 20 រាជធានីភ្នំពេញ។ ក្នុងនោះសារព័ត៌មាន «ប្រជាប្រិយ» ក៏បានចូលរួមជាដៃគូផ្សព្វផ្សាយផងដែរ។

ពិព័រណ៍នេះ លោក Fat Jase ដែលជាអ្នកប្រមូលតែមផ្ទាល់ដៃ បាននាំមកជូនតែម ៣ សម័យកាលគឺ តែមឆ្នាំ ១៨៤០ ជាតែមដំបូងបង្អស់នៅលើពិភពលោក, តែមសម័យអាណានិគមបារាំងឆ្នាំ ១៨៦៣-១៩៥៣, និង តែសម័យឯករាជ្យពីឆ្នាំ ១៩៥៣-បច្ចុប្បន្ន។

លោក Fat Jase​ បានចាប់ផ្តើមសន្សំតែមនៅក្នុងឆ្នាំ ២០១២ គឺនៅពេលលោកមានអាយុ ១៨ ឆ្នាំ កំពុងធ្វើការស្ម័គ្រចិត្តនៅប្រទេសប៉ូឡូញ។ មកដល់បច្ចុប្បន្ន លោកប្រមូលតែមប្រៃសណីយ៍បានប្រមាណ ៥ ម៉ឺនតែម។ ក្នុងនោះរាប់ចាប់តាំងពីតែម Penny Black ដែលជាតែមបុរាណដំបូងគេបង្អស់លើពិភពលោក រហូតដល់តែមសម័យទំនើប ដែលមកពីវប្បធម៌ចម្រុះ។

លោកចាប់ចិត្តបំផុតជាមួយតែម ដែលមានសិល្បៈ និង តម្លៃជាប្រវត្តិសាស្ត្រ ជាពិសេស តែមទាក់ទងនឹងប្រវត្តិសាស្ត្រកម្ពុជា។ លោកថា តែមគឺលើសពីការប្រមូល ពួកវាគឺជាអ្នកប្រាប់នូវរឿងរ៉ាវ រក្សាជ័យជម្នះ ការតស៊ូ និង សេចក្តីប្រាថ្នានៃជាតិ។

គួរឱ្យដឹងដែរថា បន្ទាប់ពីថ្ងៃសម្ពោធពិព័រណ៍ លោកអ្នកអាចចូលទស្សនាដោយសេរី ដែលការដាក់តាំងបង្ហាញ នឹងបន្តរហូតដល់ថ្ងៃទី ៣១ ខែឧសភា ឆ្នាំ ២០២៥៕