ខណៈកងកម្លាំងទាហានកម្ពុជាតាមខ្សែបន្ទាត់ព្រំដែនក្តៅនៅជួរមុខ បន្តការប្រុងប្រយ័ត្នខ្ពស់ជានិច្ចក្នុងការបំពេញតួនាទីរបស់ខ្លួនយ៉ាងខ្ជាប់ខ្ជួន ដើម្បីការពារអធិបតេយ្យភាព និង បូរណភាពទឹកដីនោះ ងាកមកកាន់កងទ័ពជួរក្រោយ ក៏នៅតែបន្តស្រុះដៃស្រុះជើងគ្នាក្នុងការចូលរួមជួយនូវអ្វី ដែលអាចធ្វើបានចំពោះប្រទេសជាតិ។
ដោយឡែក បើលើកយកកងទ័ពជួរក្រោយ ដែលជាអ្នកក្នុងវិស័យតន្ត្រីឯណោះវិញ ក្រៅពីការជួយនូវកម្លាំងកាយ កម្លាំងចិត្ត ព្រមទាំងថវិកាក្នុងការរៀបចំសម្ភារនានាជូនទៅកាន់កងទ័ពជួរមុខ និង ជនភៀសសឹកហើយនោះ ការផលិតនូវបទចម្រៀងក៏ជាផ្នែកមួយដ៏សំខាន់ក្នុងការចែករំលែកការពិតពីកម្ពុជាទៅកាន់ពិភពលោក និង ការផ្តល់កម្លាំងចិត្តទៅកាន់កងទ័ពជួរមុខដូចគ្នាដែរ។
យ៉ាងណាមិញ ថ្មីៗនេះ លោក ម៉ានិត បានផលិតបទចម្រៀងមួយបទមានចំណងជើងថា «ស៊ូស្លាប់មិនចាញ់» ដែលជាកម្លាំងបណ្តាលចិត្តចេញពីសម្តីរបស់វីរកងទ័ពជួរមុខមួយរូប ដែលនិយាយនៅលើគ្រែពេទ្យក្រោយប្រយុទ្ធនឹងកងទ័ពថៃថា «ខ្ញុំសច្ចាថា លើកលែងតែជីវិតខ្ញុំបាត់ អ្នកឯធ្វើអីធ្វើចុះ តែបើជីវិតខ្ញុំនៅ អ្នកឯងកុំប៉ងមកជាន់ទឹកដីរបស់ខ្ញុំ»។
ក្នុងនោះ ចម្រៀងប្រមាណជាង ៤ នាទី បានរៀបរាប់យ៉ាងមានអត្ថន័យពីវីរៈកងទ័ពជួរមុខរបស់កម្ពុជាយ៉ាងអាចអង់អាច ធ្វើឱ្យអ្នកបានស្តាប់ហើយព្រឺសម្បុរ ខណៈចម្រៀងមួយបទនេះ បានរៀបរាប់ការពិតពីការតស៊ូរបស់កងទ័ពកម្ពុជា ដែលត្រូវរងការឈ្លានពានពីកងទ័ពថៃមកកាន់ទឹកដីយើង៕
