អត់ស្ដាប់មេកើយទេ! មន្រ្តីជាន់ខ្ពស់ថៃ សុំឱ្យពលរដ្ឋខ្លួនឈប់អុកឡុក ឱ្យនាំគ្នាចេញពីស្រុកស្រះកែវសិន តែត្រូវប្រជាជននាំគ្នាប្រទេចផ្កាសាទៅវិញ

កាលពីថ្ងៃទី ២៨ ខែសីហា ឆ្នាំ ២០២៥ កន្លងទៅ នៅបញ្ជាការដ្ឋានកងយោធពលភូមិន្ទ និងអគ្គសេនាធិការដ្ឋានរបស់ថៃ នាយឧត្តមសេនីយ៍ Natthapol Nakphanit រដ្ឋមន្រ្តីស្តីទីក្រសួងការពារជាតិ បានលើកឡើងពីក្រុមប្រជាជនថៃ ដែលបាននាំគ្នាទៅតវ៉ានៅក្នុងភូមិបានណងចាន់ ខេត្តស្រះកែវ ដោយបានសុំឱ្យពួកគេនាំគ្នាចេញពីទីនោះសិន។

នាយឧត្តមសេនីយ៍ Natthapol Nakphanit បានឱ្យដឹងថា ខ្លួនបានបញ្ជាឱ្យក្រុមយោធាភូមិភាគទី ១ ចុះទៅសម្របសម្រួលក្រុមប្រជាជនដែលនាំគ្នាតវ៉ានៅទីនោះ ព្រោះតែបារម្ភពីបញ្ហាសុវត្ថិភាព។ នាយឧត្តមសេនីយ៍រូបនេះ ក៏បានសុំក្រុមប្រជាជនបាតុករទាំងឡាយ​ ចាកចេញពីតំបន់នោះសិន ព្រោះខ្លាចថានឹងមានការប៉ះទង្គិចរវាងប្រជាជនថៃ និងប្រជាជនខ្មែរកើតឡើង ដែលវានាំឱ្យមានការពិបាកគ្រប់គ្រងមួយកម្រិតទៀត ហើយក៏អាចប៉ះពាល់ដល់ការប្រជុំ GBC ក៏អាចថាបាន។

នាយឧត្តមសេនីយ៍ Natthapol Nakphanit បានសង្កត់ធ្ងន់លើការប្រើប្រាស់គណៈកម្មាធិការព្រំដែនទូទៅ (GBC) ជាវេទិកាសម្រាប់ដោះស្រាយបញ្ហាទាំងនេះ។ ដោយឡែក ប្រជាជនថៃជាច្រើនហាក់មិនពេញចិត្តជាមួយនឹងការណែនាំរបស់នាយឧត្តមសេនីយ៍រូបនេះឡើយ ដោយនាំគ្នាជេរប្រទេច និងចោទថាលោកធ្វើបែបនេះក៏ព្រោះតែផលប្រយោជន៍ខ្លួនឯងទៅវិញ៕

ប្រភព៖ Khaosod