អ្នកគាំទ្រនិយមតាមដានលោក ថេណា ច្បាស់ជាបានជ្រាបហើយ ពីទេពកោសល្យសិល្បៈរបស់លោក ដែលអាចច្រៀង និពន្ធ និង សម្តែងបានល្អទៀតផង។
យ៉ាងណាមិញ បើក្រឡេកមកមើលសកម្មភាពនៅខាងក្រៅឆាករបស់លោក ថេណា ឯនោះវិញ តារាចម្រៀងប្រុសរូបនេះ ត្រូវបានគេចាត់ទុកថា ជាតារាចម្រៀងប្រុសស្រគត់ស្រគំ ដែលមិនសូវចេះនិយាយស្តីនោះឡើយនៅខាងក្រៅ រហូតគេថាលោកជាបុគ្គល Introvert ទៀតផង ប៉ុន្តែយ៉ាងណា ម្ចាស់សាមីខ្លួនធ្លាប់ប្រាប់ថា លោក អត់ Introvert ទេ គ្រាន់តែជួបមនុស្សមិនសូវស្គាល់ លោកអៀនបន្តិចប៉ុណ្ណោះ។
ជាការពិតណាស់ បើទោះធ្លាប់សារភាពថា ខ្លួនពូកែអៀនក៏ពិតមែន ប៉ុន្តែបើក្រឡេកមកមើលការងាររបស់លោក ថេណា ឯណោះវិញ គេសង្កេតឃើញថាលោកពិតជាទទួលបានជោគជ័យយ៉ាងខ្លាំង ពោលគឺលោកស្ងប់ស្ងាត់ តែការងារច្បាស់លាស់ មួយដឹងមួយ។
ជាក់ស្តែង លើកយកការផលិតចម្រៀងរបស់លោក ថេណា ពីមួយបទទៅមួយបទ ភាគច្រើន គឺលោកផលិតវាតែម្នាក់ឯងប៉ុណ្ណោះ ដោយពុំសូវមានអ្នកចូលរួមនោះឡើយ ពោលគឺ សូម្បីតែការរៀបចំ ទំនុកភ្លេង ទំនុកច្រៀង និង បច្ចេកទេសនានាក្នុងបទចម្រៀង គឺលោកធ្វើតែម្នាក់ឯងគត់។
ចំណុចនេះហើយ ដែលជាហេតុធ្វើឱ្យ Top Fan របស់លោក ថេណា កាន់តែស្រឡាញ់គាំទ្រលោក ក៏ព្រោះតែលោកជាមនុស្សពូកែ និង មានជំនាញលើវិស័យតន្ត្រីច្បាស់លាស់៕
