ធ្មេចបើកៗ កម្មវិធីមហោស្រព «បុណ្យភូមិ» លើកទី ១២ បានមកដល់ហើយ ដោយឆ្នាំ ២០២៥ នេះ នឹងមានការរៀបចំចំនួន ២ លើក ដោយលើកទី ១ នៅថ្ងៃទី ៥ និង ទី ៦ ខែមេសា ឆ្នាំ ២០២៥ នៅផ្សារទំនើប ជីប ម៉ុង ២៧១ មេហ្គា ម៉ល និង នៅថ្ងៃទី ១១ និង ១២ ខែមេសា ឆ្នាំ ២០២៥ នៅវត្តស្វាយអណ្តែត។
យ៉ាងណាមិញ មហោស្រព «បុណ្យភូមិ» ឆ្នាំទី ១២ លើកទី ១ នឹងមកដល់ថ្ងៃស្អែកនេះហើយ ដោយក្នុងនោះ មហោស្រព «បុណ្យភូមិ» នឹងមានការបង្ហាញនូវផ្ទាំងទស្សនីភាព ល្ខោនខ្មែរចំនួន ៣ ទម្រង់ ដែលមកពី ៤ ក្រុមផ្សេងគ្នា ដោយក្នុងនោះរួមមាន «ល្ខោនពោលស្រីខេត្តកណ្តាល», «ល្ខោនខោលវត្តស្វាយអណ្តែត», «ល្ខោនយីកេកួយខេត្តកំពង់ធំ» និង «ល្ខោនយីកេ នីពេជខេត្តកំពង់ធំ» ជាសម្បត្តិបេតិកភណ្ឌអរូបី ដែលត្រូវការពារជាបន្ទាន់។ មិនត្រឹមតែប៉ុណ្ណោះ ល្ខោនខ្មែរចំនួន ៣ ទម្រង់ មកពី ៤ ក្រុមផ្សេងគ្នានេះ ក៏នឹងមានវត្តមានក្នុងថ្ងៃ ១១ និង ១២ ខែមេសា ឆ្នាំ ២០២៥ នៅវត្តស្វាយអណ្តែត ដែរ។
អ្វីដែលកាន់តែពិសេសទៀតនោះ នៅមហោស្រព «បុណ្យភូមិ» ទាំង ២ លើកនេះដែរ មហាជន អ្នកចូលរួមកម្សាន្ត នឹងទទួលបានអារម្មណ៍ដ៏ពិសេសមិនខុសពីឆ្នាំមុនៗនោះឡើយ ដោយអ្នកចូលរួមអាចស្លៀកក្បិន ក្រាលកន្ទេល មើលល្ខោនទាំងអស់គ្នា។ ក្នុងនោះ ការស្លៀកក្បិនចូលរួមទស្សនាល្ខោន មហាជន អ្នកចូលរួមអាចរៀបចំដោយខ្លួនឯង ឬអាចធ្វើការជួលក្បិនពីឡេឡេបុណ្យភូមិ (យុវជនស្ម័គ្រចិត្ត) នៅទីតាំងកម្មវិធីផ្ទាល់។
គួររំឭកថា មហោស្រពសិល្បៈ «បុណ្យភូមិ» បានប្រារព្ធធ្វើឡើងជារៀងរាល់ឆ្នាំ និង ទទួលបានសន្ទុះនៃការគាំទ្រពីបណ្តាអ្នកស្រុកបុណ្យភូមិ ដែលមានវត្តមានចូលរួមជាបន្តបន្ទាប់ ដែលជាសមិទ្ធផលមួយសមស្របទៅនឹងគោលបំណងរបស់កម្មវិធីបុណ្យភូមិ ដែលចង់ពាំនាំនូវបរិយាកាសអបអរសាទរទៅកាន់ពិធីបុណ្យចូលឆ្នាំខ្មែរប្រពៃណីជាតិ តាមទម្រង់បែបបទរបស់អ្នកស្រុកអ្នកភូមិពីជំនាន់ដើមរបស់ខ្មែរ ក៏ដូចជាចូលរួមលើកស្ទួយ ផ្សព្វផ្សាយ អភិរក្សទម្រង់សិល្បៈ ប្រពៃណី ទំនៀមទម្លាប់ រួមជាមួយនឹងសិល្បៈបុរាណខ្មែរ៕
