បើគិតមកដល់ពេលនេះ រយៈពេល ២ រដូវកាលមកហើយ ដែល Chef ស៊ុន ម៉េងហ៊ី បានក្លាយទៅជាគណកម្មការក្នុងការប្រកួតចម្អិនម្ហូបលំដាប់ពិភពលោក MasterChef Cambodia ពោលគឺ Chef ស៊ុន ម៉េងហ៊ី មានវត្តមាននៅរដូវកាលទី ៣ និង ទី ៤។
ជាការពិតណាស់ កន្លងមកមហាជនបានជ្រាបមកហើយពីភាពម៉ឺងម៉ាត់ និង មិនសូវនិយាយស្តីរបស់ Chef ស៊ុន ម៉េងហ៊ី នៅក្នុងកម្មវិធី សូម្បីតែនៅលើបណ្តាញសង្គមហ្វេសប៊ុកនានា ក៏ Chef ស៊ុន ម៉េងហ៊ី មិនសូវជាបង្ហាញមតិ ឬចែករំលែកអ្វីច្រើនឡើយ ក្រៅពីការងារចម្អិនម្ហូប និង ជីវិតឯកជនខ្លះៗរបស់លោក។
យ៉ាងណាមិញ ស្រាប់តែថ្មីៗនេះ ក្រោយផ្ទុះការវែកញែកជាបន្តបន្ទាប់ពីសំណាក់អតីតបេក្ខភាពនារដូវកាលទី ៣ អំឡុងពេលប្រកួតឆ្នាំមុន ស្រាប់តែ Chef ស៊ុន ម៉េងហ៊ី បានចេញមកបង្ហោះ ៣ ចំណុចដោយរៀបរាប់ថា៖ «បន្សល់ទុកគំរូល្អៗសម្រាប់ប្អូនៗជំនាន់ក្រោយ
១. លោកគ្រូ អ្នកគ្រូបង្រៀនយើងឱ្យមានចំណេះដឹងសម្រាប់ការអភិវឌ្ឍន៍ខ្លួន។
២. កិត្តិយស ភាពថ្លៃថ្នូរ និង ភាពរុងរឿងរបស់យើងគ្មាននរណាអាចផ្តល់ឱ្យយើងក្រៅអំពីខ្លួនឯងនោះទេ។
៣. សូមបន្តចែករំលែកនូវបទពិសោធល្អៗ និង ត្រឹមត្រូវដល់បងប្អូនកូនក្មួយរបស់យើងឱ្យអស់ពីលទ្ធភាព។ ដោយក្តីគោរពស្រឡាញ់ពីរៀមច្បងម្នាក់ Chef Sun Meng Hy»៕
