សង្រ្គាមការទូតដ៏ក្តៅគគុក បានចាប់ផ្តើមឡើងជាថ្មីរវាងកម្ពុជា និង ថៃ ក្រោយពីលោកជំទាវ ភឿង សកុណា រដ្ឋមន្រ្តីក្រសួងវប្បធម៌ និង វិចិត្រសិល្បៈ នៃប្រទេសកម្ពុជា បានលើកឡើងពីប្រទេសថៃ រឿងការសង់ប្រាសាទក្នុងវត្តភូម៉ានហ្វា ដោយចម្លងតាមប្លង់ប្រាសាទអង្គវត្ត នៅក្នុងអង្គប្រជុំគណៈកម្មាធិការបេតិកភណ្ឌពិភពលោកលើកទី ៤៧ កាលពីថ្ងៃទី ១០ ខែកក្កដា ឆ្នាំ ២០២៥ កន្លងទៅ។
ក្នុងនោះ ខាងភាគីប្រទេសថៃ បានមានប្រតិកម្មខ្លាំងណាស់ចំពោះរឿងនេះ ដោយបានបដិសេធដាច់ខាតថា ប្រាសាទដែលកំពង់សាងសង់នោះមិនបានចម្លងពីប្រាសាទអង្គវត្តនោះទេ តែជាស្ថាបត្យកម្មបែបពុទ្ធសាសនា ដោយយកគំរូតាមទីតាំងប្រវត្តិសាស្រ្តផ្សេងៗរបស់ថៃ។
ដោយឡែក អ្នកគ្រប់គ្រងវត្តភូម៉ានហ្វា ក៏បានតបតដែរថា វត្តនេះមិនបានចម្លងពីប្រាសាទអង្គវត្តឡើយ តែកើតចេញបញ្ញារបស់ព្រះសង្ឃថៃផ្ទាល់ ហើយមើលទៅកម្ពុជាអាចកំពុងមានបញ្ហាច្រើនពេក ទើបជាកើតការគិតច្រើនតែឯង រួចចោទថាថៃលួចចម្លងទៅវិញ។
អ្នកគ្រប់គ្រងរូបនេះ បានបន្តទៀតថា វត្តភូម៉ានហ្វា បានយកគំរូតាមប្រាសាទភ្នំរុង ប្រាសាទភីម៉ៃ ច្បាស់ណាស់ មិនបានចម្លងតាមកម្ពុជាទេ គ្រប់យ៉ាងគឺកើតចេញពីចេញបញ្ញារបស់ជនជាតិថៃ និង ព្រះសង្ឃថៃទាំងអស់។ ទោះយ៉ាងណាក៏ដោយ កម្ពុជាក៏បានស្នើឱ្យខាងយូណេស្កូពិនិត្យទៅលើការចម្លងមួយនេះរួចរាល់ដែរហើយ៕
ប្រភព៖ AMARINTV
